អ្នកការទូតជាន់ខ្ពស់ និងជានាយករដ្ឋមន្ត្រីរបស់ប្រទេសកាតា នៅថ្ងៃអង្គារ (ទី១២ ខែឧសភា ឆ្នាំ២០២៦) នេះ បានបញ្ជាក់ថា អ៊ីរ៉ង់មិនគួរប្រើប្រាស់ច្រកសមុទ្រ Hormuz ដែលខ្លួនបានបិទខ្ទប់ ចាប់តាំងពីការចាប់ផ្តើមដំបូងនូវសង្គ្រាមមជ្ឈិមបូព៌ា ជាមធ្យោបាយ ដើម្បីគំរាមកំហែងរដ្ឋឈូងសមុទ្រឡើយ។

លោក Sheikh Mohammed bin Abdulrahman Al Thani បាន និងកំពុងថ្លែងនៅឯសន្និសីទសារព័ត៌មានមួយ នៅទីក្រុងដូហា ជាមួយរដ្ឋមន្ត្រីការបរទេសទួរគី លោក Hakan Fidan ជាសម្ព័ន្ធមិត្តជិតស្និទ្ធ ដែលបានលេចឡើងក្នុងនាមជាអន្តរការីដ៏សំខាន់ៗ នៅក្នុងកិច្ចចរចាអ៊ីរ៉ង់-អាមេរិក រួមជាមួយប៉ាគីស្ថាន ដែលជាអ្នកសម្របសម្រួល។

រដ្ឋមន្ត្រីកាតា បាននិយាយថា៖ «អ៊ីរ៉ង់មិនគួរប្រើប្រាស់ច្រកសមុទ្រនេះជាអាវុធ ដើម្បីដាក់សម្ពាធ ឬគំរាមកំហែងប្រទេសឈូងសមុទ្រនើឡើយ»។ ហើយបើយោងតាមការបកប្រែជាភាសាអារ៉ាប់នៃការអត្ថាធិប្បាយរបស់ទួរគី លោក Fidan ក៏បាននិយាយផងដែរថា ច្រកសមុទ្រនេះមិនត្រូវ «ប្រើប្រាស់ជាអាវុធ» នោះទេ។

គួរបញ្ជាក់ថា ប្រទេសឈូងសមុទ្របានរងការវាយប្រហារយ៉ាងខ្លាំង ពីអ៊ីរ៉ង់ ក្នុងអំឡុងសង្គ្រាម ដោយទីក្រុងតេអេរ៉ង់ បានកំណត់គោលដៅលើធនធានរបស់សហរដ្ឋអាមេរិក ប៉ុន្តែក៏មានហេដ្ឋារចនាសម្ព័ន្ធស៊ីវិល អាកាសយានដ្ឋាន និងកន្លែងផលិតថាមពលផងដែរ។

ការបិទច្រកសមុទ្រ Hormuz របស់ទីក្រុងតេអេរ៉ង់ ដែលប្រេង និងឧស្ម័នធម្មជាតិប្រហែល ១ភាគ៥ របស់ពិភពលោកជាធម្មតាឆ្លងកាត់ ក៏បានបញ្ឈប់ការនាំចេញផ្លូវសមុទ្រដ៏សំខាន់ សម្រាប់រដ្ឋឈូងសមុទ្រ ដែលសម្បូរថាមពលផងដែរ ដែលធ្វើឲ្យប៉ះពាល់ដល់សេដ្ឋកិច្ចរបស់ប្រទេសទាំងនោះយ៉ាងខ្លាំង៕