នៅ​ថ្ងៃអង្គារ (ទី១២ ខែឧសភា ឆ្នាំ២០២៦) នេះ អធិការបតី លោក​ Friedrich Merz បានលើក​ឡើង​ថា ប្រទេសអាល្លឺម៉ង់ត្រូវតែព្រម​យក​កំណែទម្រង់រចនាសម្ព័ន្ធដែល​អាច​​ពិបាក​ទទួល​យក​ ដើម្បីការពារអនាគតរបស់ខ្លួន អំឡុង​ការ​កើត​ឡើង​នូវ​ភាពមិនប្រាកដប្រជាសកល និងវិបត្តិកាន់តែធ្ងន់ធ្ងរឡើងៗ។

លោក Merz បានប្រាប់សមាជរបស់ប្រតិភូសហជីពពាណិជ្ជកម្មអាល្លឺម៉ង់ថា៖ «យើងកំពុងឃើញភាពច្របូកច្របល់​​ភូមិសាស្ត្រ-សេដ្ឋកិច្ច នា​ពេល​នេះ ដែលកំពុងកើតឡើង​ស្របពេលមាន​​បញ្ហារចនាសម្ព័ន្ធយូរអង្វែង»។ លោកបានបញ្ជាក់​ថា៖ «វិបត្តិទាំងនេះបង្ហាញថា យើងក៏ត្រូវតែឆ្លងកាត់ការផ្លាស់ប្តូរដែរ»។

មេដឹកនាំអភិរក្សនិយមរូបនេះ បានអះអាងថា កំណែទម្រង់រចនាសម្ព័ន្ធយ៉ាងទូលំទូលាយ គឺត្រូវការជាចាំបាច់ ដើម្បីធ្វើ​ឲ្យ​ភាពប្រកួតប្រជែងអន្តរជាតិរបស់ក្រុមហ៊ុនអាល្លឺម៉ង់មាន​ឡើងវិញ ដោយនិយាយថា នៅទីបំផុត ការងារអាស្រ័យលើកំណើនសេដ្ឋកិច្ច។

លោកបានបន្ថែម​ថា ការធ្វើឲ្យ​​បរិយាកាសអាជីវកម្មល្អប្រសើរ​ឡើង នឹងតម្រូវឲ្យ​កាត់បន្ថយការិយាធិបតេយ្យ បង្កើនការវិនិយោគលើហេដ្ឋារចនាសម្ព័ន្ធ និងពន្លឿន​ឌីជីថលនីយកម្ម។

លោក Merz បានសង្កត់ធ្ងន់​ថា៖ «យើងគ្រាន់តែមិន​បាន​ធ្វើទំនើបកម្មប្រទេសរបស់យើង។ ឥឡូវនេះ រឿងនេះកំពុងវិលត្រឡប់មកលងយើងវិញ នៅក្រោម​ស្រមោលនៃកម្លាំងផ្លាស់ប្តូរសំខាន់ៗ។ ប្រសិនបើយើងចង់រក្សាវិបុលភាពរបស់យើង ក្នុងរយៈពេលវែង ប្រសិនបើយើងចង់ធានាសេរីភាព និងសន្តិភាព នៅក្នុងប្រទេសរបស់យើង សម្រាប់រយៈពេលវែង នោះយើងក៏ត្រូវតែផ្លាស់ប្តូរដូច​គ្នាដែរ»៕