អ៊ុយក្រែន៖ ក្រុមផ្ដាច់ខ្លួនគាំទ្រដោយរុស្ស៊ីបាននិយាយកាលពីថ្ងៃអង្គារថា ពួកគេកំពុងបន្តប្រយុទ្ធជាមួយកងកម្លាំងអ៊ុយក្រែននៅក្នុងតំបន់ឧស្សាហកម្មទីក្រុងកំពង់ផែ Mariupol នៅភាគខាងកើតប្រទេសអ៊ុយក្រែន។ អាជ្ញាធរឧទ្ទាមនិយាយថា ការប្រយុទ្ធនៅតែបន្តនៅក្នុងស្រុកតំបន់ឆ្នេរមួយនៃទីក្រុង។
ពួកគេអះអាងថា អគារលំនៅឋានក្នុងតំបន់កំពុងត្រូវបានបាញ់ផ្លោង ដាក់ដោយកងកម្លាំងអ៊ុយក្រែន។ ទីក្រុង Mariupol ស្ថិតនៅក្នុងតំបន់ Donbas ត្រូវបានបំផ្លាញក្នុងរយៈពេល ៦សប្តាហ៍នៃការបាញ់ផ្លោងដោយទាហានរុស្ស៊ី ដែលអភិបាលក្រុងបាននិយាយថា បានធ្វើឱ្យជនស៊ីវិលជាង ១០,០០០នាក់ស្លាប់។ តំបន់ Donbas ត្រូវបានហែកហួរដោយការប្រយុទ្ធគ្នារវាងក្រុមផ្តាច់ខ្លួនសម្ព័ន្ធមិត្តរុស្ស៊ី និងកងកម្លាំងអ៊ុយក្រែនចាប់តាំងពីឆ្នាំ២០១៤ ហើយរុស្ស៊ីបានទទួលស្គាល់ការទាមទារឯករាជ្យរបស់ក្រុមផ្តាច់ខ្លួន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
