លោក​​ប្រធានាធិបតី វ្ល៉ាឌីមៀរ ពូទីន ​ (Vladimir Putin )បាននិយាយកាលពីថ្ងៃអង្គារ ​​១២​ឧសភា      ​​សប្ដាហ៍នេះ​ ថារុស្ស៊ី ​នឹងដាក់ពង្រាយមីស៊ីលបំពាក់​ក្បាល​គ្រាប់​នុយក្លេអ៊ែរយុទ្ធសាស្ត្រ Sarmat ថ្មីរបស់ខ្លួននៅចុងឆ្នាំនេះ ដោយហៅ​ថា​ជា "មីស៊ីលដ៏មានឥទ្ធិពលបំផុតនៅលើពិភពលោក"។

ទូរទស្សន៍រដ្ឋ បាន​បង្ហាញលោក S​​ergei Karak​​ayev មេបញ្ជាការកងកម្លាំងមីស៊ីលយុទ្ធសាស្ត្ររបស់រុស្ស៊ី កំពុងរាយការណ៍ទៅកាន់លោក​ Putin អំពីអ្វីដែលលោកបាននិយាយថា ជាការបាញ់សាកល្បង មីស៊ីល​​​អន្តរទ្វីបបាលីស្ទីក​ ​Sarmat ដោយជោគជ័យកាលពីថ្ងៃអង្គារ​។ ​ ​ ​

ការដាក់ពង្រាយមីស៊ីលដែលបានគ្រោងទុក ​ត្រូវបានផលិត​​​​ឡើងដើម្បីបញ្ជូនក្បាលគ្រាប់នុយក្លេអ៊ែរ វាយប្រហារគោលដៅចម្ងាយ​​រាប់ពាន់ម៉ាយនៅក្នុង​​សហរដ្ឋអាមេរិក ឬអឺរ៉ុប បានកើតឡើងបន្ទាប់ពីការពន្យារពេលជាច្រើនឆ្នាំ។​​​​​​​​​​​​​

​នៅក្នុងការអត្ថាធិប្បាយ​តាមទូរទ​​ស្សន៍ លោក Putin ​បាននិយាយថា ទិន្នផលក្បាលគ្រាប់ គឺមាន​​​ទំហំ៤​ដង​ ធំជាង​អាវុធដូចគ្នា​របស់​លោកខាង​លិច​ និង​រយៈចម្ងាយលើសពី ​​៣៥.០០០ ​ គីឡូម៉ែត្រ។​

លោកបាននិយាយថា អាវុធថ្មីនេះ​​​​មានសមត្ថភាពជ្រាបចូលប្រព័ន្ធការពារប្រឆាំងមីស៊ីលដែលមានស្រាប់ និងនាពេលអនាគតទាំងអស់។​​

ក្រុម​អ្នកវិភាគសន្តិសុខលោកខាងលិចនិយាយថា លោក Putin បាន​អះអាងបំផ្លើសសម្រាប់សមត្ថភាពនៃអាវុធនុយក្លេអ៊ែរជំនាន់ថ្មីមួយចំនួនរបស់រុស្ស៊ី ជាផ្នែកមួយនៃកម្មវិធីទំនើបកម្ម ​​ដែលលោកបានប្រកាសជាលើកដំបូងក្នុងឆ្នាំ ២០១៨ ៕