នៅថ្ងៃពុធ (ទី១៣ ខែឧសភា ឆ្នាំ២០២៦) នេះ ប្រទេសចិនបានបញ្ជាក់ជាថ្មីនូវការប្រឆាំងយ៉ាងខ្លាំងរបស់ខ្លួន ជុំវិញ​ការលក់អាវុធរបស់សហរដ្ឋអាមេរិកទៅឲ្យកោះតៃវ៉ាន់ ដោយអំពាវនាវឲ្យទីក្រុងវ៉ាស៊ីនតោនគោរពការប្តេជ្ញាចិត្តរបស់ខ្លួន មុនពេលការទៅដល់របស់ប្រធានាធិបតីអាមេរិក លោក Donald Trump សម្រាប់កិច្ចប្រជុំកំពូល នៅទីក្រុងប៉េកាំង។

បញ្ហាតៃវ៉ាន់ ដែលជាកោះគ្រប់គ្រងដោយលទ្ធិប្រជាធិបតេយ្យ និងដែលត្រូវបានចិនចាត់ទុកថា ជាទឹកដីរបស់ខ្លួន រួមជាមួយការលក់អាវុធទៅឲ្យទីក្រុងតៃប៉ិ គឺប្រាកដជាត្រូវបានលើក​យក​មក​ពិភាក្សា ក្នុងអំឡុងរយៈ​ពេល ២ថ្ងៃនៃកិច្ចប្រជុំ នាសប្តាហ៍នេះ រវាងលោក Trump និងប្រធានាធិបតីចិន លោក ស៊ី ជីនពីង (Xi Jinping)។

សហរដ្ឋអាមេរិកត្រូវបានចងភ្ជាប់ដោយចំណងផ្លូវច្បាប់ ក្នុងការផ្តល់មធ្យោបាយដល់កោះតៃវ៉ាន់ ដើម្បីការពារខ្លួន ទោះបីជាខ្វះចំណងការទូតជាផ្លូវការក៏ដោយ។ កាលពីខែធ្នូឆ្នាំមុន រដ្ឋបាលលោក Trump បានប្រកាសកញ្ចប់លក់​អាវុធចំនួន ១១ពាន់លានដុល្លារ សម្រាប់កោះតៃវ៉ាន់ ដែលជាកញ្ចប់ធំបំផុតមិនធ្លាប់មាន​។

លោកស្រី Zhang Han អ្នកនាំពាក្យការិយាល័យទទួលបន្ទុកកិច្ចការកោះតៃវ៉ាន់របស់ប្រទេសចិន បាននិយាយថា តៃវ៉ាន់ គឺជាបញ្ហាផ្ទៃក្នុង និងជាបញ្ហាសម្រាប់ប្រជាជនចិន។ អំឡុងពេលនិយាយនៅទីក្រុងប៉េកាំង លោកស្រីបានបញ្ជាក់ថា៖ «យើងប្រឆាំងយ៉ាងម៉ឺងម៉ាត់ ចំពោះសហរដ្ឋអាមេរិក ដែលពាក់ព័ន្ធក្នុងទំនាក់ទំនងយោធាណាមួយជាមួយតំបន់តៃវ៉ាន់របស់ប្រទេសចិន ហើយប្រឆាំងយ៉ាងដាច់អហង្ការ ចំពោះការ​លក់​អាវុធរបស់​សហរដ្ឋអាមេរិក​ទៅឲ្យតំបន់តៃវ៉ាន់របស់ប្រទេសចិន។ ជំហរនេះ គឺមិនកែប្រែ និងច្បាស់លាស់ណាស់​»។

លោកស្រី Zhang បានសង្កត់ធ្ងន់ថា កោះតៃវ៉ាន់ គឺជា «ផលប្រយោជន៍ស្នូលរបស់ប្រទេសចិន» ហើយការគោរពតាមការប្តេជ្ញាចិត្តដែលធ្វើឡើងដោយរដ្ឋបាលអាមេរិកជាបន្តបន្ទាប់ គឺជា «កាតព្វកិច្ចអន្តរជាតិដែលភាគីសហរដ្ឋអាមេរិកមានកាតព្វកិច្ចត្រូវបំពេញតាម»។

គួរបញ្ជាក់ថា សហរដ្ឋអាមេរិកមិនបានប្រកាន់ជំហរជាផ្លូវការឡើយ ជុំវិញអធិបតេយ្យភាពរបស់កោះតៃវ៉ាន់ ក្រោមគោលនយោបាយ «ចិនតែមួយ» របស់ទីក្រុងវ៉ាស៊ីនតោន ប៉ុន្តែទទួលស្គាល់ ដោយមិនទទួលយកនូវ​ជំហររបស់ទីក្រុងប៉េកាំង ដែលថា កោះនេះជារបស់ចិន៕