ប្រព័ន្ធតុលាការបាននិយាយថា អ៊ីរ៉ង់នៅថ្ងៃពុធនេះ បានព្យួរកបុរសម្នាក់ដែលត្រូវបានចោទប្រកាន់ពីបទលក់ព័ត៌មានទៅឲ្យចារកម្មអ៊ីស្រាអែល ដែលជារលកចុងក្រោយបំផុតនៃការប្រហារជីវិត ក្នុងអំឡុងពេលសង្គ្រាមជាមួយប្រទេសនេះ។

ចាប់តាំងពីការចាប់ផ្តើមនៃជម្លោះជាមួយអ៊ីស្រាអែល និងសហរដ្ឋអាមេរិក ក្នុងខែកុម្ភៈមក អ៊ីរ៉ង់បានបង្កើនការប្រហារជីវិត ជាពិសេសក្នុងករណីដែលពាក់ព័ន្ធនឹងការចោទប្រកាន់ពីបទចារកម្ម ឬការចោទប្រកាន់ទាក់ទងនឹងសន្តិសុខ។

គេហទំព័រ Mizan Online របស់ប្រព័ន្ធតុលាការអ៊ីរ៉ង់ បានឲ្យដឹងថា៖«លោក Ehsan Afreshteh ជាចារកម្មដែលបានទទួលការបណ្តុះបណ្តាលដោយទីភ្នាក់ងារចារកម្ម Mossadរបស់អ៊ីស្រាអែល នៅប្រទេសនេប៉ាល់ ដែលបានលក់ព័ត៌មានរសើបទៅឲ្យអ៊ីស្រាអែល ត្រូវបានប្រហារជីវិត»។

គេហទំព័រនេះ បានឲ្យដឹងទៀតថា៖«ដោយត្រូវបានចាប់ខ្លួន និងកាត់ទោសពីបទចារកម្ម និងសហការជាមួយរបបជ្វីហ្វនិយម លោកត្រូវបានព្យួរកនៅព្រឹកថ្ងៃពុធនេះ បន្ទាប់ពីសាលក្រមត្រូវបានគាំទ្រដោយតុលាការកំពូល»៕