អ្នកការទូតចិនលោក​ Qu Xun បានប្រាប់សន្និសីទមួយនៅទីក្រុងម៉ាឌ្រីដកាលពីថ្ងៃពុធ ១៣ ឧសភា​​សប្ដាហ៍នេះថា ទីក្រុងប៉េកាំង «ខកចិត្តយ៉ាងខ្លាំង» ចំពោះ​​ផែនការនៅអឺរ៉ុបក្នុង​ការ​​រឹតបន្តឹងការវិនិយោគពីប្រទេសចិន ដោយព្រមានថា វិធានការបែបនេះនឹងជំរុញឱ្យប្រទេសចិន «បិទទ្វាររបស់ខ្លួន» ទៅកាន់អឺរ៉ុប។

នៅក្នុងការអត្ថាធិប្បាយ​​ជាសាធា​រណៈ​​​ លោក Qu តំណាងពាណិជ្ជកម្មនៅស្ថានទូតចិនប្រចាំប្រទេសអេស្ប៉ាញ បាននិយាយថា «ការគ្រប់គ្រង ការដាក់​កំហិត​​​​ និងទណ្ឌកម្មដោយអឺរ៉ុបចំពោះប្រទេសចិនក្នុងរយៈពេលបីខែកន្លងមកនេះ ធ្វើឱ្យទីក្រុង​ប៉េកាំងខកចិត្តយ៉ាងខ្លាំង»។​ ​​​

លោកបានថ្លែងនៅក្នុងកិច្ចប្រជុំមួយនៅឯព្រឹត្តិការណ៍មួយនៅសាលាពាណិជ្ជកម្ម IESE នៃទីក្រុងម៉ាឌ្រីដថា «វិធានការបែបនេះជំរុញឱ្យពួកលោក​បញ្ចេញ​​ប្រតិកម្ម និងបិទទ្វារ។ ទង្វើនេះ​​ផ្លាស់ប្តូរផ្នត់គំនិតរបស់ចិន» ដោយបន្ថែមថា ប្រទេសចិនតែងតែមើលឃើញអឺរ៉ុបជាតំបន់ដែលមាន«ចិត្តទូលាយ​»។

សភាអឺរ៉ុបកំពុងស្ថិតក្នុងដំណាក់កាលដំបូងនៃការអនុម័តច្បាប់ដែលកំណត់ច្បាប់យ៉ាងតឹងរ៉ឹងលើការគ្រប់គ្រងរបស់សហភាពអឺរ៉ុប និងភាពជាម្ចាស់នៃការផលិតនៅក្នុងឧស្សាហកម្មសំខាន់ៗ និងការកំណត់អ្នកផ្គត់ផ្គង់ «ដែលមានហានិភ័យខ្ពស់» ក្នុងសន្តិសុខបច្ចេកវិទ្យាតាម​អ៊ីនធឺណិត​​ ដែលធ្វើឲ្យប្រទេសចិនមានការខកចិត្ត។

ទីក្រុងប៉េកាំងបានជំរុញឱ្យមានការដកចេញនូវបទប្បញ្ញត្តិសំខាន់ៗស្តីពីប្រភពដើម ការផ្គត់ផ្គង់ និងតម្រូវការបច្ចេកវិទ្យានៅក្នុងច្បាប់ផលិតកម្មថ្មី និងសម្រាប់ការកាត់បន្ថយនិយមន័យនៃ "ហានិភ័យខ្ពស់" នៅក្នុងច្បាប់សន្តិសុខតាមអ៊ីនធឺណិត៕