ប្រធានាធិបតីសហរដ្ឋអាមេរិក លោក Donald Trump បាននិយាយនៅ​​ថ្ងៃព្រហស្បតិ៍ ១៤ ឧសភា​នេះ​​ ថា ទំនាក់ទំនងរបស់ប្រទេសលោកជាមួយប្រទេសចិននឹង «ប្រសើរជាងពេលណាៗទាំងអស់» ខណៈលោកបានអង្គុយពិភាក្សាទល់មុខ​គ្នា​ជាមួយសមភាគីចិនរបស់លោក គឺលោក Xi Jinping នៅទីក្រុងប៉េកាំង។​

លោក Trump បានទៅ​​​ដល់រដ្ឋធានីចិនកាលពី​​ថ្ងៃពុធ១៣ ឧសភា​សប្ដាហ៍នេះ សម្រាប់ដំណើរទស្សនកិច្ចរយៈពេលបីថ្ងៃ។ នេះជាដំណើរទស្សនកិច្ចលើកដំបូងរបស់លោកទៅកាន់ប្រទេសចិនចាប់តាំងពីឆ្នាំ ​២០១៧​ ​។​

លោក​​ប្រធានាធិបតី​ចិន​ Xi Jinping ​បានស្វាគមន៍​ និង​ចាប់ដៃ​​លោក​ Donald Trump ​ លើ​​កម្រាលព្រំក្រហម​​​ខាងក្រៅ​​​មហាសាលប្រជាជន​​​នៅកណ្ដាល​​រដ្ឋធានី​​​​ប៉េកាំង​​​នៅ​​ព្រឹកថ្ងៃព្រហស្បតិ៍​​​នេះ​។

កិច្ចប្រជុំកំពូលរវាង​ លោក​ Xi និង​ លោក​ Trump មានគោលបំណងឈានដល់កិច្ចព្រមព្រៀងលើទំនិញកសិកម្ម និងយន្តហោះ និងរក្សាការព្រមព្រៀង​​​ផ្អាក​​សង្គ្រាមពាណិជ្ជកម្មដ៏ផុយស្រួយរវាងប្រទេសដែលមានសេដ្ឋកិច្ចធំជាង​គេ​បំផុត​ទាំងពីររបស់ពិភពលោក។​

គួររម្លឹក​ថា​ដំណើរនេះត្រូវបានគ្រោងធ្វើឡើង​​​ដំបូងសម្រាប់ចុងខែមីនា ប៉ុន្តែត្រូវបានពន្យារពេលដោយសារតែសង្គ្រាមអាមេរិក-អ៊ីស្រាអែល លើអ៊ីរ៉ង់៕