អ្នកនាំពាក្យយោធាអ៊ីរ៉ង់ បាននិយាយកាលពីថ្ងៃពុធ ទី១៣ ខែឧសភា ថា ការគ្រប់គ្រងរបស់ទីក្រុងតេអេរ៉ង់ នៅច្រកសមុទ្រ Hormuz អាចបង្កើតប្រាក់ចំណូលសេដ្ឋកិច្ចដ៏សំខាន់ និងពង្រឹងជំហរអន្តរជាតិរបស់ប្រទេស។

អ៊ីរ៉ង់ បានបិទផ្លូវការដឹកជញ្ជូនឆ្លងកាត់ច្រកសមុទ្រនេះភាគច្រើន ចាប់តាំងពីការផ្ទុះសង្គ្រាមជាមួយសហរដ្ឋអាមេរិក និងអ៊ីស្រាអែល នៅថ្ងៃទី២៨ ខែកុម្ភៈ។ នៅក្នុងអំឡុងពេលសន្តិភាព ផ្លូវទឹកនេះមានប្រហែលមួយភាគប្រាំនៃការដឹកជញ្ជូនប្រេង និងឧស្ម័នធម្មជាតិរាវនៅទូទាំងពិភពលោក រួមជាមួយនឹងទំនិញសំខាន់ៗផ្សេងទៀត។

ការក្តោបក្តាប់របស់អ៊ីរ៉ង់លើផ្លូវទឹកនេះ បានធ្វើឱ្យទីផ្សារពិភពលោករង្គោះរង្គើ និងផ្តល់ឱ្យទីក្រុងតេអេរ៉ង់នូវឥទ្ធិពលដ៏សំខាន់ ខណៈសហរដ្ឋអាមេរិកបានដាក់ការបិទផ្លូវដោយកងទ័ពជើងទឹករបស់ខ្លួននៅកំពង់ផែអ៊ីរ៉ង់ ទោះបីជាមានបទឈប់បាញ់ដ៏ផុយស្រួយចាប់តាំងពីថ្ងៃទី៨ ខែមេសា ក៏ដោយ។

អ្នកនាំពាក្យយោធាលោក Mohammad Akraminia បាននិយាយថា «ការគ្រប់គ្រងរបស់យើងនៅច្រកសមុទ្រ Hormuz នឹងបង្កើតប្រាក់ចំណូលសេដ្ឋកិច្ចដ៏សំខាន់សម្រាប់ប្រទេសអ៊ីរ៉ង់ ដែលអាចបង្កើនប្រាក់ចំណូលប្រេងទ្វេដង ហើយនឹងពង្រឹងឥទ្ធិពលរបស់យើងនៅលើឆាកអន្តរជាតិ» ។

ការគ្រប់គ្រងរបស់អ៊ីរ៉ង់នៅច្រកសមុទ្រនេះ នៅតែជាចំណុចជាប់គាំងដ៏សំខាន់មួយក្នុងការចរចាជាមួយសហរដ្ឋអាមេរិក ដែលរហូតមកដល់ពេលនេះពុំទាន់បានឈានដល់ការទម្លាយភាពទាល់ច្រកណាមួយនៅឡើយ។