នាយករដ្ឋមន្ត្រីអង់គ្លេស លោក Keir Starmer បានព្រមានកាលពីថ្ងៃពុធ ១៣ ឧសភា សប្ដាហ៍​នេះ​ថា ការប្រកួតប្រជែងតំណែងមេដឹកនាំប្រឆាំងនឹងរូប​លោកនឹងធ្វើឱ្យគណបក្សការងារ​ធ្លាក់ចូលក្នុងភាពវឹកវរ ខណៈកា​​ររំពឹងទុកបានកើនឡើងលើវិធានការ​ដែលអាចកើតមានដើម្បីជំនួសតំណែង​លោក បន្ទាប់ពីលទ្ធផលបោះឆ្នោតក្នុងតំបន់​មិនល្អសម្រាប់​គណបក្សនេះ។ 

ថ្លែងស្របពេល​ភាពចលាចលកាន់តែខ្លាំងឡើងនៅក្នុងគណបក្សការងារ​​​ លោ​ក Starmer បានជំរុញ ក្រុម​​រដ្ឋមន្ត្រីកុំធ្វើឱ្យគណបក្ស​មាន​អស្ថិរ​ភាពបន្ថែ​មទៀ​ត។ សារព័ត៌មាន​ Sky News​ បាន​ដកស្រង់​​សម្ដី​របស់​​លោក​​​​​​ Keir Starmer ថា​ ​​​ការប្រកួតប្រជែងតំណែង​មេ​​​ដឹកនាំនៅថ្ងៃព្រហស្បតិ៍នេះ​​នឹងបង្កភាព​ចលាចល​១០០​ ភាគរយ។​​​​​​​

ការព្រមាននេះបានកើតឡើង ខណៈប្រព័ន្ធផ្សព្វផ្សាយអង់គ្លេសខាងលើ​​ បានរាយការណ៍ថា រដ្ឋមន្ត្រីក្រសួងសុខាភិបាល លោក Wes Streeting កំពុងពិចារណាលាលែងពីតំណែង និងចាប់ផ្តើមការប្រកួតប្រជែងតំណែង​មេ​ដឹកនាំនៅព្រឹកថ្ងៃព្រហស្បតិ៍នេះ​​ ដែលមានន័យថាលោកនឹងត្រូវការការគាំទ្រពីសមាជិកសភា​បក្ស​​ការងារ​ចំនួន៨១​ រូប រួមទាំងបេក្ខជនផងដែរ។

លោក Streeting ត្រូវបានគេមើល​​ឃើញដើរចូលទៅក្នុងវិមាន​នាយករដ្ឋមន្ត្រី​ 10 Downing Street កាលពី​ព្រឹកថ្ងៃពុធ មុនពេលបើកសភា ទោះបីជាលោកបានចាកចេញតិចជាង២០​ នាទីក្រោយមកក៏ដោយ។

សម្ពាធលើលោក Starmer បានកើនឡើងចាប់តាំងពីការបង្ហាញដ៏ខកចិត្តរបស់គណបក្សការងារ​​​​​ក្នុងការបោះឆ្នោតក្នុងតំបន់​កាលពីសប្តាហ៍មុន។ រដ្ឋមន្ត្រីរដ្ឋាភិបាលថ្នាក់ក្រោមជាច្រើនរូបបានលាលែងពីតំណែងកាលពី​​ថ្ងៃអង្គារ ខណៈរដ្ឋមន្ត្រីនៃ​​​​គណៈរដ្ឋមន្ត្រីមួយចំនួន​​​បានបញ្ជាក់ជាសាធារណៈនូវការគាំទ្ររបស់ពួកគេចំពោះលោក​នាយករដ្ឋមន្ត្រីរូបនេះ​៕