សហរដ្ឋអាមេរិក បានផ្តល់ជំនួយមនុស្សធម៌ចំនួន១០០លានដុល្លារដល់ប្រទេសគុយបា ដោយមានលក្ខខណ្ឌថា រដ្ឋាភិបាលកុម្មុយនិស្តរបស់ប្រទេសកោះមួយនេះព្រមព្រៀងចំពោះ«កំណែទម្រង់ដ៏មានប្រយោជន៍»។

ចំនួនទឹកប្រាក់សរុបត្រូវបានផ្សព្វផ្សាយជាសាធារណៈនៅក្នុងសេចក្តីថ្លែងការណ៍មួយពីក្រសួងការបរទេសសហរដ្ឋអាមេរិក កាលពីថ្ងៃពុធ ទោះបីជារដ្ឋបាលរបស់លោកប្រធានាធិបតី Donald Trump បានបញ្ជាក់ថា ខ្លួនបានផ្តល់ឲ្យជាលក្ខណៈឯកជនកាលពីពេលមុនក៏ដោយ។ ប៉ុន្តែទឹកប្រាក់ចំនួន១០០លានដុល្លារនេះ ភ្ជាប់ជាមួយនឹងលក្ខខណ្ឌមួយចំនួន មានដូចជា រដ្ឋាភិបាលគុយបាប្តេជ្ញាចិត្តចំពោះការផ្លាស់ប្តូរដែលអនុម័តដោយលោក Trump។

សេចក្តីថ្លែងការណ៍និយាយថា «បច្ចុប្បន្ន ក្រសួងការបរទេស កំពុងបញ្ជាក់ឡើងវិញជាសាធារណៈអំពីការផ្តល់ជំនួយមនុស្សធម៌របស់សហរដ្ឋអាមេរិកដោយផ្ទាល់ចំនួន១០០លានដុល្លារបន្ថែមដល់ប្រជាជនគុយបា»។ ការសម្រេចនេះ អាស្រ័យលើរបបរបស់ប្រទេសគុយបា ក្នុងការទទួលយកការផ្តល់ជំនួយរបស់យើង ឬបដិសេធជំនួយសង្គ្រោះជីវិតដ៏សំខាន់ ហើយនៅទីបំផុតត្រូវទទួលខុសត្រូវចំពោះប្រជាជនគុយបាសម្រាប់ការរារាំងជំនួយ។ ចាប់តាំងពីភាពតានតឹងនៃសង្គ្រាមត្រជាក់ក្នុងទសវត្សរ៍ឆ្នាំ១៩៦០ សហរដ្ឋអាមេរិក បានដាក់ទណ្ឌកម្មពាណិជ្ជកម្មដ៏ទូលំទូលាយលើប្រទេសកោះតំបន់សមុទ្រការ៉ាអ៊ីបមួយនេះ ដែលមួយផ្នែកជាប្រតិកម្មចំពោះបដិវត្តន៍គុយបា។ ក្រុមអ្នករិះគន់ បានថ្កោលទោសទណ្ឌកម្មពាណិជ្ជកម្មនេះថាជាការធ្វើឱ្យស្ថានភាពមនុស្សធម៌កាន់តែអាក្រក់ទៅ លើប្រទេសកោះនេះ។ វិបត្តិ បានឈានដល់ចំណុចរបត់មួយកាលពីក្នុងខែមករា បន្ទាប់ពីលោក Trump បានចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro ដែលជាសម្ព័ន្ធមិត្តជិតស្និទ្ធរបស់ប្រទេសគុយបា។