លោកប្រធានាធិបតីចិន Xi Jinping ​ បានសាទរចំពោះការចរចាពាណិជ្ជកម្មវិជ្ជមានជាមួយសហរដ្ឋអាមេរិក នៅដើមកិច្ចប្រជុំកំពូលរយៈពេលពីរថ្ងៃជាមួយប្រធានាធិបតី​ Donald Trump នៅទីក្រុងប៉េកាំង នៅថ្ងៃព្រហស្បតិ៍​នេះ​​ ដោយនឹង​មានការពិភាក្សាអំពីសង្គ្រាមអ៊ីរ៉ង់ និងការលក់អាវុធរបស់សហរដ្ឋអាមេរិកទៅឱ្យកោះ​​តៃវ៉ាន់ផងដែរ។ ​​

ដោយប្រជាប្រិយ៍​របស់លោកត្រូវបានធ្លាក់ចុះ ដោយសារការជាប់ពាក់ព័ន្ធរបស់លោកនៅមជ្ឈិមបូព៌ា ដំណើរទស្សនកិច្ច​​​​​​របស់លោក Trump ទៅកាន់ប្រទេសចិន ជាលើកដំបូងដោយប្រធានាធិបតីអាមេរិកទៅកាន់គូប្រជែងយុទ្ធសាស្ត្រសំខាន់របស់អាមេរិក ចាប់តាំងពីដំណើរទស្សនកិច្ចចុងក្រោយរបស់លោកនៅទីនោះក្នុងឆ្នាំ ២០១៧ បានក្លាយជាជំនួបកាន់តែមានសារៈសំខាន់បន្ថែមទៀត។

​បន្ទាប់ពីមេដឹកនាំចិនបានទទួលស្វាគម​​​ន៍​រូប​លោកដ៏កក់ក្ដៅ​ នៅឯមហា​សាលប្រជាជនដ៏ធំ​​របស់ទីក្រុងប៉េកាំង ដែលមានកងកិត្តិយស និងហ្វូងកុមារ​គ្រវីផ្កា និងទង់ជាតិសហរដ្ឋអាមេរិក និងចិនយ៉ាងរំភើប លោក Trump បានប្រាប់លោក​ Xi ​ថា​ ​​​​អ្នកគឺ​ជាមេដឹកនាំ​ដ៏អស្ចារ្យ​ ពេលខ្លះ មានគេ​​​មិនចូលចិត្ត​លោកនិយាយបែបនេះទេ ​​ ​តែ​រូបលោក​និយាយបែបនេះ ​គ្រប់ទីកន្លែង​។​​

លោក Trump បាននិយាយថា មានអ្នកដែលនិយាយថា នេះអាចជាកិច្ចប្រជុំកំពូលដ៏ធំបំផុតមិនធ្លាប់មាន។ លោកបានបន្ថែមថា នេះ​​ជាកិត្តិយសមួយដែលបាននៅជាមួយអ្នក។ វាជាកិត្តិយសមួយដែលបានធ្វើជាមិត្តរបស់អ្នក ហើយទំនាក់ទំនងរវាងចិន និងសហរដ្ឋអាមេរិក ​នឹងកាន់តែប្រសើរឡើងជាងពេលណាៗទាំងអស់។​

លោក Xi បានបើកកិច្ចប្រជុំកំពូលដោយប្រាប់លោក​​Trump ថា​ ​ ទំនាក់ទំនងចិន-សហរដ្ឋអាមេរិកដែលមានស្ថិរភាពផ្តល់ផលប្រយោជន៍ដល់ពិភពលោកទាំងមូល។ នៅពេលដែល​ពួកលោក​​សហការគ្នា ភាគីទាំងពីរទទួលបានអត្ថប្រយោជន៍។ នៅពេលដែលពួកលោក​​ប្រឈមដាក់គ្នា ភាគីទាំងពីរក៏ខាតបង់ដែរ៕