អ៊ុយក្រែន៖ អភិបាលក្រុង Mariupol លោក Vadym Boychenko កាលពីថ្ងៃពុធបានចោទប្រកាន់រុស្ស៊ីថា បានប្រើប្រាស់អាវុធគីមីក្នុងការវាយលុករបស់ខ្លួនលើទីក្រុងរបស់លោក។ លោក Boychenko បាននិយាយថា កងកម្លាំងរុស្ស៊ីបានវាយប្រហារមកលើទាហានអ៊ុយក្រែនមួយចំនួនដោយប្រើប្រាស់អាវុធគីមី ប៉ុន្តែមិនបានផ្តល់ព័ត៌មានលម្អិតបន្ថែមអំពីស្ថានភាពរបស់ពួកគេ ឬអាវុធដែលបានប្រើនោះទេ។
ប្រធានាធិបតីអ៊ុយក្រែនលោក Volodymyr Zelenskyy បានអះអាងកាលពីថ្ងៃពុធថា ប្រទេសរុស្ស៊ីបានប្រើប្រាស់គ្រាប់បែកផូស្វ័រក្នុងអំឡុងពេលការវាយលុករបស់ខ្លួន។ ការអះអាងនេះមិនអាចត្រូវបានបញ្ជាក់ដោយប្រភពឯករាជ្យនោះទេ។ ទីក្រុងកំពង់ផែ Mariupol ដែលត្រូវបានឡោមព័ទ្ធបានឃើញការប្រយុទ្ធគ្នាខ្លាំងជាច្រើនសប្តាហ៍ និងមានដំណើរការតិចតួចបំផុត ឬគ្មានសោះសម្រាប់ក្បួនរថយន្តមនុស្សធម៌។
លោក Boychenko បាននិយាយថា កងកម្លាំងរុស្ស៊ីបានស្វែងរកការបិទទីក្រុង Mariupol ក្នុងបំណងលាក់បាំងឧក្រិដ្ឋកម្មសង្គ្រាមដែលត្រូវបានចោទប្រកាន់។ អភិបាលក្រុង Mariupol និយាយថា ប្រទេសរុស្ស៊ីបានបំផ្លាញ ៩០% នៃហេដ្ឋារចនាសម្ព័ន្ធនៅក្នុងទីក្រុងរបស់អ៊ុយក្រែនមួយនេះ។ មន្ទីរពេទ្យ ទីជម្រកការពារពីគ្រាប់បែក និងតំបន់លំនៅឋានត្រូវបានបំផ្លាញក្នុងទីក្រុងបណ្ដាលឲ្យមនុស្សជាង ២១.០០០នាក់ស្លាប់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
