លោក Ali Bagheri អនុប្រធានក្រុមប្រឹក្សាសន្តិសុខជាតិជាន់ខ្ពស់អ៊ីរ៉ង់ បាននិយាយក្នុងអំឡុងពេលជួបជាមួយលោក Alexander Venediktov អនុលេខាធិការក្រុមប្រឹក្សាសន្តិសុខរុស្ស៊ីថា រុស្ស៊ីបានបង្ហាញតាមរយៈសកម្មភាពរបស់ខ្លួននៅអង្គការសហប្រជាជាតិថា ខ្លួនបម្រើជាអ្នកធានាសន្តិសុខ ក្នុងវិបត្តិមជ្ឈិមបូព៌ា។

លោក Bagheri កំពុងដឹកនាំគណៈប្រតិភូរបស់ទីក្រុងតេអេរ៉ង់ នៅក្នុងកិច្ចប្រជុំលេខាធិការនៃក្រុមប្រឹក្សាសន្តិសុខនៃអង្គការសហប្រតិបត្តិការសៀងហៃ (SCO) ដោយមានការពិភាក្សារវាងមន្ត្រីសន្តិសុខរុស្ស៊ី និងអ៊ីរ៉ង់ នៅខាងក្រៅព្រឹត្តិការណ៍នេះ។

យោងតាមលោក Bagheri សកម្មភាពរបស់អាមេរិកនៅលើឆាកអន្តរជាតិ បានបង្ហាញថា ពួកគេស្វែងរកការប្រែក្លាយពិភពលោក ទៅជាព្រៃមួយប្រភេទ ដែលគ្មានកន្លែងសម្រាប់នីតិរដ្ឋ»។

លោកបាននិយាយថា៖«ជំហររឹងមាំរបស់រុស្ស៊ីប្រឆាំងនឹងការឈ្លានពានរបស់សហរដ្ឋអាមេរិក និងអ៊ីស្រាអែល បានបង្ហាញនៅក្នុងការអនុវត្តថា ដោយពឹងផ្អែកលើច្បាប់អន្តរជាតិ ទីក្រុងមូស្គូនឹងមិនអនុញ្ញាតឲ្យពិភពលោកត្រូវបានប្រែក្លាយ ទៅជាព្រៃនោះទេ»។

លោក Bagheri បានបន្ថែមថា ការសម្រេចចិត្តរបស់រុស្ស៊ីក្នុងការវេតូសេចក្តីព្រាងសេចក្តីសម្រេចរបស់សហរដ្ឋអាមេរិកនៅក្រុមប្រឹក្សាសន្តិសុខអង្គការសហប្រជាជាតិ «មានគោលបំណងជំរុញអស្ថិរភាព» បានបង្ហាញថា ទីក្រុងមូស្គូដើរតួជាអ្នកធានាសន្តិសុខ៕