ខណៈលោក Trump និងលោក Xi ទំនងជាបានពិភាក្សាអំពីការដំឡើងពន្ធនិងទំនាក់ទំនងសេដ្ឋកិច្ច ការលក់អាវុធតម្លៃ១៤ពាន់លានដុល្លារទៅឱ្យកោះតៃវ៉ាន់ដែលជាប់គាំង នៅតែមិនច្បាស់លាស់ ជុំវិញដំណើរការនេះ។

ការលក់អាវុធ ដែលត្រូវបានគាំទ្រដោយសមាជិកសភាអាមេរិក ប៉ុន្តែវាតម្រូវឱ្យមានការចុះហត្ថលេខាជាផ្លូវការរបស់លោក Trump ដើម្បីបន្តឈានទៅមុខ។ យោងតាមសមាជិកព្រឹទ្ធសភាអាមេរិក លោក Andy Kim បានឲ្យដឹងថា កញ្ចប់នេះរួមមាន «យុទ្ធោបករណ៍ប្រឆាំងយានដ្រូន ប្រព័ន្ធបញ្ជាការប្រយុទ្ធរួមបញ្ចូលគ្នា និងគ្រាប់រំសេវរយៈចម្ងាយមធ្យម»។

ទោះជាយ៉ាងណា អនាគតនៃការលក់អាវុធ អាចនឹងស្ថិតក្នុងសំណួរ បន្ទាប់ពីលោក Trump បាននិយាយថា ការលក់អាវុធរបស់សហរដ្ឋអាមេរិក ទៅឱ្យកោះតៃវ៉ាន់នឹងស្ថិតនៅក្នុងរបៀបវារៈជាមួយលោក Xi។

កិច្ចពិភាក្សានេះ ប្រឈមនឹងការរុញឲ្យបកក្រោយនូវគោលនយោបាយរបស់សហរដ្ឋអាមេរិកជាយូរអង្វែងមក ដែលកំណត់ដោយប្រធានាធិបតី លោក Ronald Reagan ដែលថាទីក្រុងវ៉ាស៊ីនតោន មិនបានពិគ្រោះយោបល់ជាមួយទីក្រុងប៉េកាំងទេលើការលក់អាវុធរបស់ខ្លួនទៅឱ្យកោះតៃវ៉ាន់។