ពលរដ្ឋអ៊ុយក្រែនដែលកំពុងស្ទង់មើលកម្ទេចកម្ទីនៃការវាយប្រហារតាមច្រកអាកាសរបស់រុស្ស៊ីនៅជិតទីក្រុងគីវ បានបង្ហាញមន្ទិលសង្ស័យរបស់ពួកគេ ចំពោះជំនួបកំពូលរវាងប្រធានាធិបតីសហរដ្ឋអាមេរិកលោក Donald Trump និងប្រធានាធិបតីចិនលោក Xi Jinping ថានឹងអាចបញ្ចប់សង្រ្គាមមួយនេះ ។

ក្រុមមន្រ្តីនិយាយថា រុស្ស៊ីបានបើកការវាយប្រហារលើរដ្ឋធានីអ៊ុយក្រែន និងតំបន់ជាច្រើនទៀតកាលពីយប់កន្លងទៅ នៅក្នុងការវាយប្រហារមីស៊ីល និងយានដ្រូនទ្រង់ទ្រាយធំ ដែលបានសម្លាប់មនុស្សជាច្រើននាក់ និងមនុស្សរាប់សិបនាក់ផ្សេងទៀត រងរបួស ។

ប្រធានាធិបតីអ៊ុយក្រែនលោក Volodymyr Zelenskyy និយាយថា ការបាញ់ស្រោចដោយយានដ្រូនរបស់រុស្ស៊ីនៅពេលថ្ងៃ ដែលភាគច្រើនដាក់គោលដៅទៅលើភាគខាងលិចប្រទេសអ៊ុយក្រែន បានសម្លាប់មនុស្សយ៉ាងហោចណាស់ ១៤នាក់ និងមនុស្សជាង៨០នាក់ រងរបួស ជាអ្វីដែលទំនងជាចំណុចកណ្តាលនៃយុទ្ធសាស្ត្រទម្លាក់គ្រាប់បែកតាមអាកាសរបស់ទីក្រុងមូស្គូ ។

លោកថា ចាប់តាំងពីពាក់កណ្តាលអធ្រាត្ររហូតមក យានដ្រូនរបស់រុស្ស៊ីយ៉ាងហោចណាស់ ៨០០ គ្រឿងត្រូវបានបាញ់បង្ហោះ ហើយមនុស្ស ១៤នាក់ ត្រូវបានសម្លាប់ និងមនុស្សជាង៨០នាក់ផ្សេងទៀត បានរងរបួស រួមមានទាំងកុមារផងដែរ ។

លោក Serhii គឺជាពលរដ្ឋអ៊ុយក្រែនវ័យ ៦៥ឆ្នាំម្នាក់ដែលឈរនៅជិតប្លុកអគារផ្ទះល្វែងរងការខូចខាតស្ថិតក្នុងទីក្រុង Shchaslyve និយាយថា ការពិតទៅ ពួកគេបានត្រឹមតែជជែកគ្នាប៉ុណ្ណោះ ។ ពួកគេនឹងនិយាយថា ពួកគេនឹងដាក់ឥទ្ធិពល ដើម្បីបញ្ចប់សង្រ្គាម ប៉ុន្តែវានឹងមិនកើតឡើងនោះទេ ៕