រដ្ឋមន្ត្រីការបរទេសមកពីក្រុមប្រទេស BRICS ក្នុងនោះរួមមានទាំងអ៊ីរ៉ង់ និងរុស្ស៊ីផងដែរ ជួបជុំគ្នានៅប្រទេសឥណ្ឌា នាថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នេះ ដោយជម្លោះ នៅតំបន់មជ្ឈិមបូព៌ា និងវិបត្តិពាក់ព័ន្ធប្រេងឥន្ធនៈ នឹងគ្របដណ្ដប់លើការពិភាក្សា។

ឥណ្ឌា ដែលកាន់តំណែងជាប្រធាន BRICS ក្នុងឆ្នាំ២០២៦ នេះ នឹងធ្វើជាម្ចាស់ផ្ទះនៃកិច្ចប្រជុំរយៈពេល ២ថ្ងៃរបស់រដ្ឋមន្ត្រីការបរទេសមកពីប្លុកមានបន្ថែមសមាជិក ដែលឥឡូវនេះរួមមានទាំងអ៊ីរ៉ង់ និងអេមីរ៉ាតអារ៉ាប់រួម ជាប្រទេសដែលមានជម្លោះជាមួយគ្នា ដោយសារសង្គ្រាមបង្កឡើងដោយសហរដ្ឋអាមេរិក និងអ៊ីស្រាអែលកាលពីថ្ងៃទី២៨ ខែកុម្ភៈ។

អ្នកនាំពាក្យ លោក Randhir Jaiswal បានប្រាប់អ្នកសារព័ត៌មានថា ក្រសួងការបរទេសឥណ្ឌា បានលើកឡើងថា កិច្ចពិភាក្សានឹងផ្តោតលើ «បញ្ហាសកល និងតំបន់ដែលជាផលប្រយោជន៍រួម»។ ស្ថានទូតអ៊ីរ៉ង់ប្រចាំប្រទេសឥណ្ឌា បានឲ្យដឹងថា រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានទៅដល់ទីក្រុងញូវដេលី កាលពីយប់ថ្ងៃទី១៣ ខែឧសភា។ រដ្ឋមន្ត្រីការបរទេសរុស្ស៊ី លោក Sergey Lavrov ក៏នឹងចូលរួមផងដែរ។ លោក Lavrov បានជួបជាមួយសមភាគីឥណ្ឌា លោក Subrahmanyam Jaishankar បន្ទាប់ពីបានទៅដល់ទីក្រុងញូវដេលី កាលពីល្ងាចថ្ងៃទី១៣ ខែឧសភា។

ការរំខាននៅជុំវិញផ្លូវដឹកជញ្ជូនឈូងសមុទ្រ និងច្រកសមុទ្រ Hormuz បន្តជំរុញឲ្យមានការប្រែប្រួល ក្នុងទីផ្សារប្រេង និងឧស្ម័ន ដែលបង្កើនសម្ពាធលើសេដ្ឋកិច្ចនាំចូលថាមពល ក្នុងនោះរួមមានទាំងប្រទេសឥណ្ឌាផងដែរ។

គួរបញ្ជាក់ថា BRICS ត្រូវបានបង្កើតឡើងក្នុងឆ្នាំ២០០៩ ជាវេទិកាសម្រាប់សេដ្ឋកិច្ចកំពុងរីកចម្រើនធំៗដែលស្វែងរកការមានឥទ្ធិពលកាន់តែខ្លាំង នៅក្នុងស្ថាប័នគ្រប់គ្រងដោយមហាអំណាចលោកខាងលិច។ ក្រុមនេះ ដែលដើមឡើយមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង បានពង្រីកសមាជិកបន្ថែមតាំងពីពេលនោះមក ខណៈដែលសមាជិកបានប្រឹងប្រែងជំរុញឥទ្ធិពលទាំងផ្នែកនយោបាយ និងសេដ្ឋកិច្ចសកលរបស់ប្លុក។ ឥឡូវនេះ ប្លុករួមបញ្ចូលទាំងអេហ្ស៊ីប អេត្យូពី អ៊ីរ៉ង់ ឥណ្ឌូនេស៊ី និងអារ៉ាប់រួម តែគេនៅតែមិនច្បាស់ថា តើតំណាងមកពីរដ្ឋជាសមាជិកទាំងអស់នឹងចូលរួមដែរ ឬយ៉ាងណា៕