ប្រជាពលរដ្ឋរស់នៅក្នុងទីក្រុងប៉េកាំង បានបង្ហាញក្តីសង្ឃឹមរបស់ពួកគេនៅថ្ងៃព្រហស្បតិ៍នេះថា កិច្ចប្រជុំរវាងប្រធានាធិបតីសហរដ្ឋអាមេរិកលោក Donald Trump និងប្រធានាធិបតីចិនលោក Xi Jinping នឹងជួយធ្វើឲ្យស្ថិរភាពដល់ទំនាក់ទំនងប្រទេសមហាអំណាចសេដ្ឋកិច្ចធំបំផុតទាំង ២របស់ពិភពលោក ខណៈពួកគេបង្ហាញក្តីបារម្ភផងដែរ ពីចរិកមិនអាចព្យាករបានរបស់លោក Trump ។

អ្នកស្រី Zhang គឺជាអ្នកស្ម័គ្រចិត្តសហគមន៍វ័យ ៦៧ឆ្នាំម្នាក់រស់នៅក្នុងទីក្រុងប៉េកាំង និយាយថា ពេលខ្លះលោក Trump និយាយក្រឡាស់ពាក្យសម្តីរបស់ខ្លួន ប៉ុន្តែអ្នកស្រីសង្ឃឹមថា ជំនួបមួយនេះជាមួយលោកប្រធានាធិបតី Xi នឹងទទួលបានលទ្ធផលល្អ ។

ចំណែកឯអ្នកស្រី Li Tuo គឺជាសាស្រ្តាចារ្យសាកលវិទ្យាល័យចូលនិវិត្តន៍មួយរូព និយាយដែរថា អ្នកស្រីនឹងតាមដានយ៉ាងដិតដល់កិច្ចប្រជុំមួយនេះ ពីព្រោះថា វាពាក់ព័ន្ធនឹងសេដ្ឋកិច្ចរបស់ពួកយើង ។

លោក Trump កំពុងស្ថិតក្នុងដំណើរទស្សនកិច្ចផ្លូវរដ្ឋរយៈពេល ៣ថ្ងៃទៅកាន់ចិន ចាប់ពីថ្ងៃទី ១៣ ខែឧសភា រហូតដល់ថ្ងៃទី ១៥ ខែឧសភា ដែលជាដំណើរទស្សនកិច្ចលើកដំបូងរបស់លោក ក្នុងរយៈពេល ៩ឆ្នាំ ។

ដំណើរទស្សនកិច្ចនេះ បានកើតមាន ស្របពេលដែលទីក្រុងវ៉ាស៊ីនតោន និងទីក្រុងប៉េកាំង ព្យាយាមគ្រប់គ្រងជម្លោះ ចាប់ពីបញ្ហាពាណិជ្ជកម្ម និងបច្ចេកវិទ្យា រហូតដល់បញ្ហាកោះតៃវ៉ាន់ និងបញ្ហាសន្តិសុខ ៕