ដោយសំអាង​ដល់​ប្រភពមួយ ទីភ្នាក់ងារសារព័ត៌មានពាក់កណ្តាលផ្លូវការ Fars បានរាយការណ៍​នៅ​ថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នេះ​ថា ប្រទេស​អ៊ីរ៉ង់បានចាប់ផ្តើមអនុញ្ញាតឲ្យ​នាវាចិនមួយចំនួនឆ្លងកាត់ច្រកសមុទ្រ Hormuz បន្ទាប់ពីមាន​ការយោគយល់គ្នា លើពិធីសារគ្រប់គ្រងរបស់អ៊ីរ៉ង់ ចំពោះ​ផ្លូវទឹកនេះ។

របាយការណ៍របស់សារព័ត៌មាន​ Fars ពាក់ព័ន្ធ​នឹង​ការអនុញ្ញាត​នេះ បានកើតឡើងនៅពេលដែលប្រធានាធិបតីអាមេរិក លោក​ Donald Trump ដែលកំពុងបំពេញទស្សនកិច្ចផ្លូវរដ្ឋ នៅ​ប្រទេសចិន បានយល់ស្របជាមួយមេដឹកនាំចិន លោក​ ស៊ី ជីនពីង (Xi Jinping) ថា ច្រកសមុទ្រ Hormuz ត្រូវតែបន្ត​បើកចំហដោយសេរីដដែល​ សម្រាប់លំហូរថាមពល​។

ប្រភពនោះ​បានប្រាប់សារព័ត៌មាន Fars ថា ចំណាត់ការ​នេះបានកើតឡើងបន្ទាប់ពីមាន​សំណើរបស់រដ្ឋមន្ត្រីការបរទេស និងឯកអគ្គរដ្ឋទូតចិន ប្រចាំអ៊ីរ៉ង់ ដោយទីក្រុងតេអេរ៉ង់យល់ព្រមសម្រួលដល់ការឆ្លងកាត់របស់នាវាចិនមួយចំនួន ស្របតាមភាពជាដៃគូយុទ្ធសាស្ត្ររបស់ប្រទេសទាំង២។

ភ្លាមៗនេះ គេមិនទាន់​ច្បាស់នោះ​ទេថា តើចំណាត់​ការ​នេះបានផ្លាស់ប្តូរស្ថានភាពជាក់ស្ដែង​ដែរ ឬយ៉ាង​ណា ដោយ​អ៊ីរ៉ង់បានបង្ហាញរួចហើយ ក្នុងអំឡុងពេលមាន​សង្គ្រាមថា នាវាអព្យាក្រឹត ជាពិសេសនាវាដែលមានទំនាក់ទំនងជាមួយប្រទេសចិន អាចឆ្លងកាត់ច្រកសមុទ្របាន ដរាបណាពួកគេសម្របសម្រួលជាមួយកងកម្លាំងប្រដាប់អាវុធអ៊ីរ៉ង់។

ចំណែក​ទិន្នន័យតាមដាននាវា ​បានបង្ហាញថា នាវាដឹកប្រេងដ៏ធំ ១គ្រឿងរបស់ចិនដែលដឹកប្រេងឆៅអ៊ីរ៉ាក់ចំនួន ២លានបារ៉ែល បានធ្វើដំណើរឆ្លងកាត់ច្រកសមុទ្រ Hormuz កាលពីថ្ងៃពុធ បន្ទាប់ពីជាប់នៅឈូងសមុទ្រនេះ​អស់រយៈពេលជាង ២ខែ ដោយសារសង្គ្រាមអាមេរិក ជាមួយ​អ៊ីរ៉ង់៕