មន្ត្រីអ៊ុយក្រែន បាននិយាយកាលពីថ្ងៃព្រហស្បតិ៍ ទី១៤ ខែឧសភា ថា រុស្ស៊ីបានវាយប្រហារតាមអាកាសទ្រង់ទ្រាយធំបំផុតរបស់ខ្លួនក្នុងរយៈពេលពីរថ្ងៃកន្លងទៅនេះចាប់តាំងពីការចាប់ផ្តើមសង្គ្រាមនៅអ៊ុយក្រែន ដោយបានវាយប្រហាររដ្ឋធានីគីវ និងទីក្រុងដទៃទៀតដោយយានដ្រូនរាប់រយគ្រឿង។

ប្រធានាធិបតីអ៊ុយក្រែន លោក Volodymyr Zelenskyy បាននិយាយថា រុស្ស៊ីបានបាញ់បង្ហោះយានដ្រូន ១.៥៦៧គ្រឿងចាប់តាំងពីថ្ងៃពុធ។ មន្ត្រីបាននិយាយថា ជនស៊ីវិលយ៉ាងហោចណាស់២៧នាក់ត្រូវបានសម្លាប់ក្នុងរយៈពេលពីរថ្ងៃកន្លងទៅនេះ។

ប្រធានាធិបតីរុស្ស៊ី លោក Vladimir Putin បាននិយាយថា សង្គ្រាម ដែលបានសម្លាប់មនុស្សរាប់ម៉ឺននាក់ និងបំផ្លាញតំបន់ជាច្រើននៅប្រទេសអ៊ុយក្រែនក្នុងរយៈពេលជាងបួនឆ្នាំ នឹងឈានដល់ទីបញ្ចប់។ ប៉ុន្តែ ខណៈទីក្រុងមូស្គូបានចាប់ផ្តើមអ្វីដែលអ៊ុយក្រែននិយាយថាជាយានដ្រូនវាយប្រហារជាង៦៧០ គ្រឿង និងមីស៊ីល៥៦គ្រាប់កាលពីពេលយប់ លោក Zelenskyy ស្តាប់ទៅពុំមានភាពវិជ្ជមាន ទេ។

លោក Zelenskyy និយាយថា «ទាំងនេះ ពុំមែនជាសកម្មភាពរបស់អ្នកទាំងឡាយដែលជឿថា សង្គ្រាមនឹងឈានដល់ទីបញ្ចប់នោះទេ។ វាជារឿងសំខាន់ដែលដៃគូ មិននៅស្ងៀមចំពោះការវាយប្រហារនេះ ហើយវាក៏សំខាន់ដូចគ្នា ក្នុងការបន្តគាំទ្រការការពារជើងមេឃរបស់យើង»។

អង្គភាពសេវាសង្គ្រោះបន្ទាន់រដ្ឋអ៊ុយក្រែន បាននិយាយថា មនុស្សយ៉ាងហោចណាស់ ២១ នាក់ រួមទាំងកុមារ ៣ នាក់ ត្រូវបានសម្លាប់នៅក្នុងរដ្ឋធានី ហើយអភិបាលក្រុង លោក Vitali Klitschko បានប្រកាសកាន់ទុក្ខមួយថ្ងៃនៅថ្ងៃសុក្រនេះ។ នៅក្នុងសេចក្តីថ្លែងការណ៍ដែលចេញផ្សាយក្រោយពាក់កណ្តាលអធ្រាត្រ អង្គភាពសេវាសង្គ្រោះបន្ទាន់និយាយថា ប្រតិបត្តិការជួយសង្គ្រោះនៅបន្តទាំងយប់ទាំងថ្ងៃ។