រដ្ឋមន្ត្រីការបរទេសឥណ្ឌា លោក Subrahmanyam Jaishankar បានអំពាវនាវឱ្យមាន "លំហូរសមុទ្រដែលមានសុវត្ថិភាព និងគ្មានឧបសគ្គ" ឆ្លងកាត់ដែនទឹកអន្តរជាតិ រួមទាំងច្រកសមុទ្រ Hormuz ផងដែរ ខណៈក្រុម​ប្រទេស BRICS ដែល​បាន​ខ្វែងគំនិត​គ្នាខា​ងនយោបា​យបានជួបជុំគ្នា​នៅទីក្រុង New Delhi កាលពីថ្ងៃព្រហស្បតិ៍ ​​​​​១៤​​ឧសភា សប្ដាហ៍នេះ​​។

លោក Jaishankar បានថ្លែងនៅក្នុងសុន្ទរកថាបើក​ថា ​ប្លុក​នេះ​​បាន​​​​ជួបគ្នានៅពេលដែលមានការប្រែប្រួលយ៉ាងខ្លាំងក្នុងទំនាក់ទំនងអន្តរជាតិ។លោក​​ថា មានការរំពឹងទុកកាន់តែខ្លាំង ជាពិសេសពីទីផ្សារដែលកំពុងរីកចម្រើន និងប្រទេសកំពុងអភិវឌ្ឍន៍ ថា ក្រុម​ប្រទេស​​​ BRICS នឹងដើរតួនាទីស្ថាបនា និងធ្វើឱ្យមានស្ថិរភាព។​ 

ការអំពាវនាវរបស់លោក Jaishankar សម្រាប់ស្ថិរភាពកើតឡើងស្រប​​​​ពេលមានការបែកបាក់ផ្ទៃក្នុងនៅក្នុងក្រុមដែលបានពង្រីកខ្លួន​ក្នុងរយៈពេលប៉ុន្មានឆ្នាំមកនេះ។   

បច្ចុប្បន្ននេះ​​ ក្រុម​ប្រទេស​ជាសមាជិក​ BRICS រួមមានអេហ្ស៊ីប អេត្យូពី អ៊ីរ៉ង់ ឥណ្ឌូនេស៊ី និងអារ៉ាប់រួម (UAE) បន្ថែមពីលើសមាជិកដើម ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។​​

សមាជិក BRICS គឺអ៊ីរ៉ង់ និងអេមីរ៉ាត​អារ៉ាប់រួម​ មានការខ្វែងគំនិតគ្នាជាពិសេសមុនពេលកិច្ចប្រជុំដោយសារតែសង្គ្រាមអាមេរិក-អ៊ីស្រាអែល​​លើ​​​​អ៊ីរ៉ង់។រដ្ឋមន្ត្រីការបរទេសអ៊ីរ៉ង់ លោក Abbas Araghchi បានចោទប្រកាន់អារ៉ាប់រួមថា បានចូលរួមដោយផ្ទាល់ក្នុងប្រតិបត្តិការយោធា ប្រឆាំងនឹងប្រទេសលោក។ ជាមួយគ្នានោះ លោកAraghchi បានជំរុញឲ្យរដ្ឋសមាជិកក្រុមប្រទេស BRICS ថ្កោលទោសអ្វីដែលរូបលោកចាត់ទុកថា ជាការបំពានច្បាប់អន្តរជាតិដោយអាមេរិក និងអ៊ីស្រាអែលរួមទាំងការឈ្លានពានខុសច្បាប់របស់ពួកគេលើអ៊ីរ៉ង់ ។

ឥឡូវនេះ ក្រុម​​អ្នកជំនាញមានការព្រួយ​បារម្ភ​​​ថា ក្រុមនេះ​អាចនឹងពិបាកក្នុងការឯកភាពគ្នាលើរូបមន្តរួមមួយ ដើម្បីពិពណ៌នាអំពីសង្គ្រាមអាមេរិក-អ៊ីស្រាអែល លើអ៊ីរ៉ង់ និងការរីករាលដាល​​នៃជម្លោះកាន់តែធំ​នៅមជ្ឈិមបូព៌ា។ប្រមុខ​ការទូត​ឥណ្ឌា​​រូបនេះ​​​​ ក៏បានអំពាវនាវផងដែរ​ដល់ថ្នាក់ដឹកនាំឱ្យ​​​ដោះស្រាយការងាកទៅរកវិធានការបង្ខិតបង្ខំឯកតោភាគី និងទណ្ឌកម្មដែលមិនស្របនឹងច្បាប់អន្តរជាតិ និងធម្មនុញ្ញអង្គការសហប្រជាជាតិ៕