អ្នកតំណាងពាណិជ្ជកម្មសហរដ្ឋអាមេរិក លោក Jamieson Greer បាននិយាយថា ភាគីចិនបានបញ្ជាក់យ៉ាងច្បាស់ក្នុងអំឡុងជំនួបកំពូលនៅទីក្រុងប៉េកាំងជាមួយលោកប្រធានាធិបតី Trump ថា ខ្លួនចង់ឱ្យច្រកសមុទ្រហ័រមូសបើកឡើងវិញ ដោយគ្មានការរឹតត្បិត ឬការបង់ប្រាក់។

លោក Greer បានប្រាប់ប្រព័ន្ធផ្សព្វផ្សាយអាមេរិកពីទីក្រុងប៉េកាំងថា «វាពិតជាសំខាន់ សម្រាប់ប្រទេសចិនក្នុងការបើកច្រកសមុទ្រហ័រមូស គ្មានការបង់ប្រាក់ គ្មានការគ្រប់គ្រងដោយយោធា ហើយនោះច្បាស់ណាស់ពីកិច្ចប្រជុំ ដូច្នេះយើងស្វាគមន៍ចំពោះបញ្ហានេះ»។

ចំពោះសំណួរអំពីការគាំទ្ររបស់ចិនសម្រាប់អ៊ីរ៉ង់ លោក Greer បាននិយាយថា ទីក្រុងវ៉ាស៊ីនតោន ជឿថា ទីក្រុងប៉េកាំង នឹងធ្វើសកម្មភាពជាក់ស្តែង ហើយ «ចិន កំពុងមានភាពប្រាកដប្រជា និងមិនចង់នៅខាងខុសនៃបញ្ហានេះទេ»។ លោកបាននិយាយបន្ថែមថា «ពួកគេចង់ឃើញសន្តិភាពនៅក្នុងតំបន់នោះ។ លោកប្រធានាធិបតី Trump ចង់ឃើញសន្តិភាពនៅក្នុងតំបន់ ដូច្នេះយើងមានទំនុកចិត្តយ៉ាងខ្លាំងថា ពួកគេនឹងធ្វើអ្វីដែលពួកគេអាចធ្វើបានដើម្បីកំណត់ការគាំទ្រផ្នែកសម្ភារៈគ្រប់ប្រភេទសម្រាប់អ៊ីរ៉ង់»។