រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បាននិយាយកាលពីថ្ងៃព្រហស្បតិ៍ថា ប្រទេសនេះ បានត្រៀមខ្លួនរួចជាស្រេចសម្រាប់លទ្ធភាពដែលខ្លួនអាចនឹងត្រូវការបន្តការវាយលុករបស់ខ្លួន ក្នុងពេលឆាប់ៗនេះ ដើម្បីសម្រេចគោលដៅនៃយុទ្ធនាការយោធារបស់ខ្លួនប្រឆាំងនឹងអ៊ីរ៉ង់។

ការអត្ថាធិប្បាយនេះ បានកើតឡើង មួយថ្ងៃបន្ទាប់ពីអនុប្រធានាធិបតីអាមេរិក លោក J.D. Vance បាននិយាយថា វឌ្ឍនភាពកំពុងត្រូវបានធ្វើឡើង នៅក្នុងការចរចាជាមួយអ៊ីរ៉ង់ ប៉ុន្តែកិច្ចព្រមព្រៀងណាមួយត្រូវតែធានាថា ទីក្រុងតេអេរ៉ង់មិនអភិវឌ្ឍន៍អាវុធនុយក្លេអ៊ែរ។

លោក Katz បានថ្លែងនៅក្នុងពិធីរំលឹកវិញ្ញាណក្ខន្ធទាហានថា៖«បេសកកម្មរបស់យើង មិនទាន់ចប់ទេ»។ «យើងត្រូវតែសម្រេចគោលដៅនៃយុទ្ធនាការតាមរបៀបដែលធានាថា អ៊ីរ៉ង់នឹងមិនក្លាយជាការគំរាមកំហែងដល់អត្ថិភាពរបស់អ៊ីស្រាអែល ចំពោះកងកម្លាំងអាមេរិក ... សម្រាប់ជំនាន់ក្រោយៗទៀតឡើយ»។

លោកបានបន្ថែមថា៖«យើងត្រៀមខ្លួនរួចជាស្រេចសម្រាប់លទ្ធភាព ដែលយើងនឹងត្រូវបានទាមទារឲ្យធ្វើសកម្មភាពម្តងទៀត ក្នុងពេលឆាប់ៗនេះ ដើម្បីធានាថា គោលដៅទាំងនេះត្រូវបានសម្រេច»។

លោក Katz ក៏បានលើកឡើងពីការវាយប្រហារដោយយានដ្រូនបំផ្ទុះរបស់ក្រុមហេសបូឡា បន្ទាប់ពីយន្តដ្រូនមួយគ្រឿងដែលបានបាញ់ចេញពីប្រទេសលីបង់ បានវាយប្រហារភាគខាងជើងអ៊ីស្រាអែល កាលពីថ្ងៃព្រហស្បតិ៍ ដោយបានបណ្តាលឲ្យមនុស្សបីនាក់រងរបួស៕