អធិការបតីអាល្លឺម៉ង់ លោក Friedrich Merz បាននិយាយកាលពីថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) ថា ការទម្លាក់គ្រាប់បែកយ៉ាងខ្លាំងក្លារបស់រុស្ស៊ីលើរដ្ឋធានីគីវវរបស់អ៊ុយក្រែន បានបង្ហាញថា ទីក្រុងមូស្គូ «កំពុងធ្វើឲ្យសង្គ្រាមមានកាន់តែខ្លាំងឡើងៗ ជាជាងស្វែងរកការចរចា»។

អ្នកសារព័ត៌មាន លោក Peter Beaumont សរសេរថា ទីក្រុងគីវបានរងការវាយប្រហារយ៉ាងធ្ងន់ធ្ងរ ស្ទើរតែឥតដាច់ នៅថ្ងៃនេះ។ ហើយសេវាសង្គ្រោះបន្ទាន់បានឲ្យដឹងថា យ៉ាងហោចណាស់មនុស្ស ១៦នាក់ រួមទាំងកុមារ ២នាក់ផងដែរ ត្រូវបានសម្លាប់នៅក្នុងរដ្ឋធានីនេះ។ ចំណែកអភិបាលក្រុង លោក Vitali Klitschko បានប្រកាសថ្ងៃសុក្រនេះជាថ្ងៃកាន់ទុក្ខ។

ប្រធានាធិបតីអ៊ុយក្រែន លោក Volodymyr Zelenskyy បាននិយាយថា រុស្ស៊ីបានបាញ់យានដ្រូនចំនួន ១.៥៦៧គ្រឿង ចាប់តាំងពីព្រឹកថ្ងៃពុធ។ មន្ត្រីបាននិយាយថា យ៉ាងហោចណាស់ជនស៊ីវិលចំនួន ២២នាក់ត្រូវបានសម្លាប់នៅថ្ងៃពុធ និងថ្ងៃព្រហស្បតិ៍។ ការវាយប្រហារនេះកើតឡើងបន្ទាប់ពីប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃសៅរ៍ចុងសប្ដាហ៍កន្លងមកថា សង្គ្រាមកំពុង «ឈានដល់ទីបញ្ចប់»។ តែលោក Zelenskyy បានលើកឡើងកាលពីថ្ងៃព្រហស្បតិ៍ថា «ទាំងនេះពិតជាមិនមែនជាសកម្មភាពរបស់អ្នកដែលជឿថា សង្គ្រាមកំពុងឈានដល់ទីបញ្ចប់នោះឡើយ»។

លោក Merz បានសង្កត់ធ្ងន់ថា៖ «ទីក្រុងគីវ និងដៃគូរបស់ខ្លួនបានត្រៀមខ្លួនរួចជាស្រេច សម្រាប់ការចរចាដែលមានគោលបំណងឲ្យមានសន្តិភាពដ៏យុត្តិធម៌ តែរុស្ស៊ីវិញកំពុងបន្តសង្គ្រាម។ ខណៈពេលដែលអ៊ុយក្រែន និងអឺរ៉ុប ចង់ជួយបញ្ចប់សង្គ្រាមដ៏អាក្រក់នេះឲ្យបានឆាប់រហ័សតាមដែលអាច ការវាយប្រហាររបស់រុស្ស៊ី បង្ហាញរូបភាពផ្សេង ផ្ទុយនឹងសម្ដីរបស់លោក Putin ដែលថា សង្គ្រាមអាចនឹងជិតដល់ទីបញ្ចប់»៕