វិមានរដ្ឋសភា៖ វគ្គបណ្ដុះបណ្ដាលស្ដីពីសុចរិតភាពព័ត៌មាន ត្រូវបានបើកជាផ្លូវការ ដើម្បីពង្រឹងសមត្ថភាពមន្ត្រីរដ្ឋសភា និងយុវជនក្នុងការឆ្លើយតបទៅនឹង

ការរីកចម្រើននៃបច្ចេកវិទ្យាឌីជីថល និងបញ្ញាសិប្បនិម្មិត (AI) សំដៅធានានូវស្ថិរភាពព័ត៌មាន និងសន្តិសុខសង្គម។

នារសៀលថ្ងៃទី១៥ ខែឧសភា ឆ្នាំ២០២៦ ក្នុងពិធីបើកវគ្គបណ្ដុះបណ្ដាល

ក្រោមប្រធានបទ «យុទ្ធសាស្ត្ររដ្ឋតូចក្នុងនយោបាយពិភពលោក»ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា និងជាប្រធានក្រុមរដ្ឋសភាកម្ពុជានៃសភាវ័យក្មេង បានគូសបញ្ជាក់ពីតួនាទីដ៏សំខាន់របស់យុវជន និងមន្ត្រីជំនាញ ក្នុងការធ្វើជាបង្អែកដ៏រឹងមាំដើម្បីការពារសុចរិតភាពព័ត៌មាន។

ឯកឧត្តមប្រធានគណៈកម្មការ បានសង្កត់ធ្ងន់លើចំណុចគន្លឹះសំខាន់ៗ រួមមាន៖

ការត្រៀមលក្ខណៈចំពោះហានិភ័យបច្ចេកវិទ្យាថ្មី៖ ការវិវត្តនៃ AI បាននាំមកនូវបញ្ហាប្រឈមថ្មីៗ ដូចជាការបង្កើតរូបភាព និងសំឡេងក្លែងក្លាយ (Deepfakes) ការវាយប្រហារលើប្រព័ន្ធទិន្នន័យ និងការប្រើប្រាស់ព័ត៌មានបំភ្លៃក្នុងសង្គ្រាមចិត្តសាស្ត្រ ដែលអាចធ្វើឱ្យប៉ះពាល់ដល់សណ្ដាប់ធ្នាប់សង្គម និងសាមគ្គីភាពជាតិ។

ការពង្រឹងអភិបាលកិច្ចបច្ចេកវិទ្យា៖ រដ្ឋសភាលើកទឹកចិត្តឱ្យសិក្ខាកាមអភិវឌ្ឍខ្លួនពី «អ្នកទទួលព័ត៌មាន» ទៅជា «អ្នកការពារ និងអ្នកបង្កើតព័ត៌មានពិត» តាមរយៈការផ្ទៀងផ្ទាត់ប្រភពឱ្យបានហ្មត់ចត់ការប្រើប្រាស់ឧបករណ៍ឌីជីថលដោយ

ទំនួលខុសត្រូវ និងការគោរពក្របខ័ណ្ឌច្បាប់ឱ្យបានខ្ជាប់ខ្ជួន។

យុទ្ធសាស្ត្រកិច្ចសហប្រតិបត្តិការចម្រុះ៖ ការការពារសុចរិតភាពព័ត៌មាន គឺជាកិច្ចការអន្តរវិស័យដែលទាមទារឱ្យមានការចូលរួមពីគ្រប់ភាគីពាក់ព័ន្ធ រួមមានរដ្ឋាភិបាល វិស័យឯកជន សង្គមស៊ីវិល និងប្រជាពលរដ្ឋគ្រប់រូប ដើម្បីបង្កើតឱ្យបាននូវ «ប្រព័ន្ធអេកូឡូស៊ីព័ត៌មាន» ដ៏រឹងមាំមួយ។

វគ្គបណ្ដុះបណ្ដាលដែលមានរយៈពេល ៧ សប្ដាហ៍នេះបង្កើតឡើងក្រោម

សហប្រតិបត្តិការរវាង ក្រុមរដ្ឋសភាកម្ពុជានៃសភាវ័យក្មេង ជាមួយ វិទ្យាស្ថានចក្ខុវិស័យអាស៊ី (AVI) និង មូលនិធិ ខុនរ៉ាត់ អាឌិនណៅអ៊ែរ (KAS) ប្រចាំកម្ពុជា។ នេះគឺជាផ្នែកមួយនៃកិច្ចខិតខំប្រឹងប្រែងរបស់រដ្ឋសភា ក្នុងការជំរុញការយល់ដឹងជាសាធារណៈអំពី AI និងការកសាងសង្គម

មួយដែលផ្អែកលើចំណេះដឹង និងសុចរិតភាព។ តាមរយៈកម្មវិធីនេះ រដ្ឋសភាកម្ពុជាបានបង្ហាញពីការប្ដេជ្ញាចិត្តខ្ពស់ក្នុងការការពារផលប្រយោជន៍ជាតិក្នុង

យុគសម័យឌីជីថល និងការរៀបចំយុវជនជំនាន់ក្រោយឱ្យមានសមត្ថភាពពេញលេញ ក្នុងការដើរតួជាកម្លាំងចលករការពារសន្តិសុខ និងសន្តិភាពព័ត៌មាននៅក្នុងតំបន់ និងសកលលោក៕