នៅថ្ងៃសុក្រ (ទី១៥ ខែឧសភា ឆ្នាំ២០២៦) នេះ ប្រទេសចិនបានបញ្ជាក់​ថា ខ្លួនមានឆន្ទៈក្នុងការធ្វើការជាមួយប្រទេសទាំងអស់ ដើម្បីការពារសន្តិសុខថាមពលសកល និងរក្សាស្ថិរភាពខ្សែច្រវាក់​ឧស្សាហកម្ម និងខ្សែច្រវាក់ផ្គត់ផ្គង់ បន្ទាប់ពីមាន​នូវ​កិច្ចពិភាក្សាកម្រិតខ្ពស់ រវាងប្រធានាធិបតីចិន លោក​ Xi Jinping និងប្រធានាធិបតីអាមេរិក លោក Donald Trump នៅទីក្រុងប៉េកាំង។

ជាការ​ឆ្លើយតបទៅនឹងសំណួរអំពីថា តើប្រទេសចិនបានយល់ព្រមទិញប្រេងរបស់សហរដ្ឋអាមេរិក ក្នុងអំឡុងពេលមាន​កិច្ចប្រជុំកំពូលដែរ ឬអត់ អ្នកនាំពាក្យក្រសួងការបរទេសចិន លោក​ Guo Jiakun បាននិយាយថា អាទិភាពបន្ទាន់ នៅតែជាការស្តារសន្តិភាព និងស្ថិរភាព​ឡើង​វិញ នៅក្នុង​ឈូងសមុទ្រ និងតំបន់​មជ្ឈិមបូព៌ា។

លោក Guo បានប្រាប់អ្នកសារព័ត៌មាននៅទីក្រុងប៉េកាំងថា៖ «ប្រទេសចិនមានឆន្ទៈ ក្នុងការធ្វើការជាមួយគ្រប់ភាគី ដើម្បីរួមគ្នាការពារសន្តិសុខថាមពលសកល និងស្ថិរភាពនៃឧស្សាហកម្ម និងខ្សែច្រវាក់ផ្គត់ផ្គង់»។

ហើយ​នៅពេលត្រូវបាន​សួរថា តើកិច្ចសហប្រតិបត្តិការបញ្ញាសិប្បនិម្មិត (AI) ត្រូវបានពិភាក្សាក្នុងអំឡុងជំនួបកំពូលនេះដែរ ឬទេ លោក Guo បាននិយាយថា ប្រទេសចិនគាំទ្រកិច្ចសហប្រតិបត្តិការអន្តរជាតិ ស្ដីពី​ ​​AI និងលើកកម្ពស់វិធីសាស្រ្ត «ប្រកប​ដោយ​ភាព​បើកចំហ និងបរិយាបន្ន​» ចំពោះការអភិវឌ្ឍបច្ចេកវិទ្យា។

ដោយឡែក​ពាក់ព័ន្ធ​នឹង​សំណួរទាក់ទងនឹងការគ្រប់គ្រងការនាំចេញបន្ទះ​អេឡិចត្រូនិក និងការផ្គត់ផ្គង់រ៉ែកម្ររបស់សហរដ្ឋអាមេរិក លោក Guo បានបញ្ជាក់ជាថ្មី អំពីជំហរយូរអង្វែងរបស់ទីក្រុងប៉េកាំង និងបានសង្កត់ធ្ងន់លើការប្តេជ្ញាចិត្តរបស់ប្រទេសចិន ក្នុងការរក្សាស្ថិរភាព និងសន្តិសុខនៃខ្សែច្រវាក់​ផ្គត់ផ្គង់សកល។

ការកត់សម្គាល់នេះបានកើតឡើងមួយថ្ងៃបន្ទាប់ពីលោក Xi និងលោក Trump បានធ្វើកិច្ចពិភាក្សាយ៉ាងទូលំទូលាយ នៅទីក្រុងប៉េកាំង ដោយផ្តោតលើពាណិជ្ជកម្ម ស្ថិរភាពយុទ្ធសាស្ត្រ បច្ចេកវិទ្យា និងបញ្ហាសន្តិសុខ ក្នុងតំបន់៕