ការលក់អាវុធរបស់សហរដ្ឋអាមេរិកទៅឲ្យតៃវ៉ាន់តែងតែជាមូលដ្ឋានគ្រឹះនៃសន្តិភាព និងស្ថិរភាព ក្នុងតំបន់ ហើយជាអ្វីមួយដែលត្រូវបានបញ្ជាក់នៅក្នុងច្បាប់អាមេរិក។ នេះបើយោងតាមអ្នកការទូតជាន់ខ្ពស់តៃវ៉ាន់ម្នាក់ដែលបាននិយាយនៅថ្ងៃសៅរ៍ (ទី១៦ ខែឧសភា ឆ្នាំ២០២៦) នេះ បន្ទាប់ពីប្រធានាធិបតីអាមេរិក លោក Donald Trump បានប្រាប់ថា លោកមិនទាន់សម្រេចចិត្តពីការលក់នាពេលអនាគតនៅឡើយទេ។

ទោះបីជាខ្វះចំណងការទូតជាផ្លូវការជាមួយកោះតៃវ៉ាន់ក៏ដោយ ក៏សហរដ្ឋអាមេរិក គឺជាអ្នកគាំទ្រអន្តរជាតិដ៏សំខាន់បំផុតសម្រាប់កោះស្វ័យគ្រប់គ្រងដោយលទ្ធិប្រជាធិបតេយ្យមួយនេះ ដែលប្រទេសចិនអះអាងថា ជាទឹកដីរបស់ខ្លួន។ ទីក្រុងវ៉ាស៊ីនតោនត្រូវបានចងភ្ជាប់ដោយចំណងច្បាប់ទំនាក់ទំនងតៃវ៉ាន់ ដើម្បីផ្តល់អាវុធដល់កោះនេះ។

ប៉ុន្តែនៅថ្ងៃទី១៥ ខែឧសភា បន្ទាប់ពីមានជំនួបកំពូលជាមួយប្រធានាធិបតីចិន លោក Xi Jinping នៅទីក្រុងប៉េកាំង លោក Trump បាននិយាយថា លោកមិនទាន់សម្រេចចិត្តថា តើត្រូវបន្តការលក់អាវុធដ៏សំខាន់នេះដែរ ឬអត់នោះទេ ជាការលើកឡើងដែលបន្ថែមភាពមិនប្រាកដប្រជា អំពីការគាំទ្ររបស់សហរដ្ឋអាមេរិក ចំពោះកោះតៃវ៉ាន់។

អំឡុងពេលថ្លែងទៅកាន់អ្នកសារព័ត៌មាន នៅទីក្រុងតៃប៉ិ នាថ្ងៃទី១៦ ខែឧសភានេះ មន្រ្តីរងទទួលបន្ទុកកិច្ចការបរទេសកោះតៃវ៉ាន់ លោក Chen Ming-chi បាននិយាយថា ការលក់អាវុធរបស់សហរដ្ឋអាមេរិក គឺជាអ្វីមួយដែលត្រូវបានបញ្ជាក់នៅក្រោមច្បាប់ទំនាក់ទំនងតៃវ៉ាន់។ លោកបានសង្កត់ធ្ងន់ថា៖ «ការលក់អាវុធតៃវ៉ាន់-អាមេរិក តែងតែជាមូលដ្ឋានគ្រឹះនៃសន្តិភាព និងស្ថិរភាពក្នុងតំបន់»។

គួរបញ្ជាក់ថា កាលពីខែធ្នូឆ្នាំមុន រដ្ឋបាលរបស់លោក Trump បានអនុម័តកញ្ចប់លក់អាវុធចំនួន ១១ពាន់លានដុល្លារ សម្រាប់កោះតៃវ៉ាន់។ ទីភ្នាក់ងារសារព័ត៌មាន Reuters បានរាយការណ៍ថា កញ្ចប់លក់ទី២ ដែលមានតម្លៃប្រហែល ១៤ពាន់លានដុល្លារ នៅតែរង់ចាំការយល់ព្រមពីលោក Trump៕