ឯកអគ្គរដ្ឋទូតចិនប្រចាំអង្គការសហប្រជាជាតិ (UN) កាលពីថ្ងៃសុក្រ (ទី១៦ ខែឧសភា ឆ្នាំ២០២៦) បានរិះគន់សំណើ​​សេចក្តីសម្រេចរបស់សហរដ្ឋអាមេរិក-បារ៉ែន ស្តីពីច្រកសមុទ្រ Hormuz ដោយលើកឡើង​ថា ខ្លឹមសារ និងពេលវេលាមិនត្រឹមត្រូវ ហើយការអនុម័តវានឹងមិនផ្ដល់​ប្រយោជន៍អ្វី​ទេ។

សេចក្តីព្រាងសេចក្តីសម្រេចនេះ​ទាមទារឲ្យ​អ៊ីរ៉ង់បញ្ឈប់ការវាយប្រហារ និងការដាក់​មីន នៅក្នុងច្រកសមុទ្រ ប៉ុន្តែអ្នកការទូតបាននិយាយថា ខ្លួនទំនងជានឹងជួប​ជាមួយ​ការវេទូ​ពី​រុស្ស៊ី និងចិនវេតូមិន​ខាន​ ប្រសិនបើការ​ស្នើនោះ​ទៅ​ដល់ ដើម្បីធ្វើការ​​បោះឆ្នោត។ ប្រទេសទាំង២ បានវេតូសេចក្តីសម្រេចស្រដៀងគ្នានេះ ដែលគាំទ្រដោយសហរដ្ឋអាមេរិក កាលពីខែមុន ដោយអះអាងថា វាមាន​ភាព​លម្អៀង ប្រឆាំង​នឹង​អ៊ីរ៉ង់។

គេហទំព័រព័ត៌មាន Pass Blue ដែលផ្តោតលើព័ត៌មានរបស់ UN បានបង្ហោះវីដេអូខ្លីមួយនៃបទសម្ភាសន៍ភ្លាមៗជាមួយលោក Fu Gong បេសកជន UN របស់ប្រទេសចិន ដោយ​លោកបាននិយាយនៅពេលត្រូវបាន​សួរអំពីសេចក្តីសម្រេចនេះថា៖ «យើងមិនគិតថាខ្លឹមសារសម​ស្រប​នោះ​ទេ ហើយពេលវេលាក៏មិនត្រឹមត្រូវដែរ​»។

លោក​បាន​បញ្ជាក់​ថា៖ «អ្វីដែលយើងត្រូវការគឺជំរុញឲ្យ​ភាគីទាំង២ ចូលរួមក្នុងការចរចាដ៏ប្រាកដ​ប្រជា​ និងស្មោះត្រង់ដែលអាចដោះស្រាយបញ្ហាបាន។ ដូច្នេះ សម្រាប់​ការអនុម័តសេចក្តីសម្រេច នៅដំណាក់កាលនេះ ​យើងមិនគិតថា វានឹងជួយជា​ប្រយោជន៍​នោះទេ»។

លោក Fu បានបន្ថែម​ថា ប្រសិនបើប្រទេសចិនមាន​សិទ្ធិអំណាច​សម្រេច​គ្រប់គ្រាន់​ ក្នុងនាមជាប្រធានបច្ចុប្បន្ន​នៃ​ក្រុមប្រឹក្សាសន្តិសុខ UN ដែលមានសមាជិក ១៥រូប​​ សេចក្តីសម្រេចនេះនឹងមិនត្រូវបានលើកយកមក ដើម្បី​ធ្វើ​ការ​បោះឆ្នោតឡើយ​៕