ប្រធានាធិបតីអាមេរិក លោក Donald Trump កាលពីថ្ងៃសុក្រ (ទី១៥ ខែឧសភា ឆ្នាំ២០២៦) បានបញ្ជាក់ថា លោកមិនបានលើកឡើងពីបញ្ហាពន្ធគយយកមកពិភាក្សាឡើយ ក្នុងអំឡុងជំនួបកំពូលជាប្រវត្តិសាស្ត្រជាមួយសមភាគីចិនរបស់លោក គឺលោក Xi Jinping។

ពេលត្រឡប់ទៅកាន់ទីក្រុងវ៉ាស៊ីនតោនវិញ បន្ទាប់ពីបានធ្វើអ្វីដែលលោកហៅថា «កិច្ចព្រមព្រៀងពាណិជ្ជកម្មដ៏អស្ចារ្យ» ជាមួយទីក្រុងប៉េកាំង លោក Trump បាននិយាយអំពីពន្ធគយថា៖ «យើងមិនបានពិភាក្សាអំពីរឿងទាំងនោះទេ។ វាមិនត្រូវបានលើកឡើងយកមកពិភាក្សាទេ»។

មេដឹកនាំទាំង២ ត្រូវបានគេរំពឹងទុកយ៉ាងទូលំទូលាយថា នឹងពិភាក្សាអំពីការបន្ថែមរយៈពេលនៃការផ្អាកជម្លោះពន្ធគយរយៈពេល ១ឆ្នាំដែលសម្រេចបានក្នុងអំឡុងពេលមានកិច្ចប្រជុំចុងក្រោយរបស់ពួកលោក ក្នុងខែតុលាឆ្នាំមុន នៅប្រទេសកូរ៉េខាងត្បូង។ ការផ្អាកនេះបាននាំមកនូវការបញ្ឈប់សង្គ្រាមពាណិជ្ជកម្មដ៏ខ្លាំងក្លាមួយ ដែលបានឃើញការដំឡើងពន្ធលើទំនិញជាច្រើនលើសពី ១០០ភាគរយ។ លក្ខខណ្ឌបានផ្លាស់ប្តូរ ចាប់តាំងពីពេលនោះមក។

លោក Trump បានមកដល់ទីក្រុងប៉េកាំងកាលនៅដើមសប្តាហ៍នេះ ដោយស្វែងរកការចុះហត្ថលេខាលើកិច្ចព្រមព្រៀង ក្នុងវិស័យនានា រួមទាំងវិស័យកសិកម្ម អាកាសចរណ៍ និងបញ្ញាសិប្បនិម្មិត (AI) ផងដែរ។

បន្ទាប់ពីថ្ងៃដំបូងបានបញ្ចប់ លោក Trump បាននិយាយថា លោក Xi បានយល់ព្រមជួយបើកច្រកសមុទ្រ Hormuz ក៏ដូចជាទិញយន្តហោះរបស់ក្រុមហ៊ុន Boeing និងប្រេង និងសណ្តែកសៀងរបស់អាមេរិក។

ប៉ុន្តែមិនមានការប្រកាសជាផ្លូវការណាមួយឡើយ ហើយក្រសួងការបរទេសចិន ទាំងមិនបានបញ្ជាក់អះអាង ឬបដិសេធ ចំពោះសេចក្តីថ្លែងការណ៍របស់លោក Trump នៅពេលដែលត្រូវបានសួរកាលពីរសៀលថ្ងៃទី១៥ ខែឧសភា៕