ប្រធានាធិបតីអាមេរិក លោក Donald Trump បាននិយាយសម្រាលពីហានិភ័យនៃជម្លោះ រវាងសហរដ្ឋអាមេរិក និងចិន ជុំវិញបញ្ហាកោះតៃវ៉ាន់ បន្ទាប់ពីមាននូវកិច្ចប្រជុំកំពូលរយៈពេល ២ថ្ងៃរបស់លោក ជាមួយសមភាគីចិន គឺលោក Xi Jinping។

អំឡុងពេលថ្លែងទៅកាន់អ្នកសារព័ត៌មាន នៅលើយន្តហោះ Air Force One បន្ទាប់ពីចាកចេញពីទីក្រុងប៉េកាំងកាលពីថ្ងៃសុក្រ (ទី១៥ ខែឧសភា ឆ្នាំ២០២៦) មេដឹកនាំអាមេរិករូបនេះបាននិយាយថា លោក Xi «មិនចង់ឃើញសង្គ្រាមទេ» ប៉ុន្តែក៏ «មិនចង់ឃើញចលនាទាមទារឯករាជ្យ» ដោយកោះតៃវ៉ាន់ដែរ។

នៅក្នុងបទសម្ភាសន៍ក្រោយមកជាមួយប្រព័ន្ធផ្សព្វផ្សាយ Fox News លោក Trump បានប្រាប់កោះតៃវ៉ាន់កុំឲ្យមានឯករាជ្យជាផ្លូវការ ដោយនិយាយថា «យើងមិនរំពឹងឲ្យកើតឡើងឡើយ ដែលថា មាននរណាម្នាក់និយាយថា ចូរទាមទារឯករាជ្យ ពីព្រោះសហរដ្ឋអាមេរិកកំពុងគាំទ្រយើង»។

នៅពេលត្រូវបានសួរអំពីផែនការលក់អាវុធរបស់សហរដ្ឋអាមេរិកទៅឲ្យកោះតៃវ៉ាន់ នៅមុននេះ លោកបាននិយាយថា លោកនឹងធ្វើ «ការសម្រេចចិត្តក្នុងរយៈពេលដ៏ខ្លីខាងមុខ»។ ស្ថាប័នការបរទេសកោះតៃវ៉ាន់ កាលពីថ្ងៃទី១៥ ខែឧសភា បានឲ្យដឹងថា ខ្លួនបានកត់សម្គាល់ពីការលើកឡើងរបស់លោក Trump ហើយបានបញ្ជាក់ជាថ្មីថា ការលក់អាវុធរបស់សហរដ្ឋអាមេរិក គឺជាការប្តេជ្ញាចិត្តផ្នែកសន្តិសុខដែលមានចែងក្នុងច្បាប់ទំនាក់ទំនងតៃវ៉ាន់ (Taiwan Relations Act)។

គួរបញ្ជាក់ថា កោះតៃវ៉ាន់ គឺជាប្រធានបទសំខាន់មួយនៃការពិភាក្សាដោយមេដឹកនាំនៃប្រទេសដ៏មានអំណាចបំផុតទាំង២ របស់ពិភពលោក អំឡុងជំនួបកំពូលរបស់ពួកលោក ដែលបានបញ្ចប់នៅថ្ងៃទី១៥ ខែឧសភា។ បញ្ហានេះមានការយកចិត្តទុកដាក់ខ្ពស់ ប៉ុន្តែលទ្ធផលមានកម្រិត៕