អាជ្ញាធរ បានឲ្យ​ដឹង​កាលពីថ្ងៃសុក្រ (ទី១៥ ខែឧសភា ឆ្នាំ២០២៦) ថា អគ្គិភ័យ និងការផ្ទុះដ៏ធំមួយ នៅឯ​រោងចក្រឈើមួយកន្លែង ក្នុងតំបន់ Midcoast របស់រដ្ឋ Maine បានបណ្ដាល​ឲ្យ​អ្នកពន្លត់អគ្គិភ័យម្នាក់បាត់បង់​ជីវិត និងបានធ្វើឲ្យ​មនុស្សយ៉ាងហោចណាស់ ១១នាក់ផ្សេងទៀតរងរបួស។

មន្ត្រីរបស់​រដ្ឋនេះ​បាននិយាយថា អ្នកពន្លត់អគ្គិភ័យត្រូវបានប្រទះ​ឃើញស្លាប់ នៅក្នុង​រោងចក្រនេះ​។ អាជ្ញាធរបានបញ្ជាក់ថា អ្នកពន្លត់អគ្គិភ័យរូបនោះ​ គឺជាផ្នែកនៃការឆ្លើយតបបន្ទាន់ ចំពោះអណ្តាតភ្លើងដែលកំពុងឆាបឆេះ នៅឯរោង​ចក្រ​ Robbins Lumber ក្នុង​តំបន់ជនបទមួយ នៅពេលដែលស៊ីឡាំង​មួយបានផ្ទុះ​។

តម្រួត​ការិយាល័យពន្លត់អគ្គិភ័យរដ្ឋ Maine លោក Shawn Esler បាននិយាយថា ការស៊ើបអង្កេតលើមូលហេតុ អាចនឹងមិនផ្តល់ចម្លើយភ្លាមៗបាន​ឡើយ​។

មជ្ឈមណ្ឌលវេជ្ជសាស្ត្រ MaineHealth Maine ក្នុងទីក្រុង Portland ដែលមានការកំណត់កម្រិតរបួសកម្រិត ១ បានឲ្យ​ដឹង​ថា ខ្លួនកំពុងព្យាបាលអ្នករង​របួស​ ១០នាក់ដែលត្រូវបានផ្ទេរពីមន្ទីរពេទ្យមូលដ្ឋាន​។ ចំណែក​អ្នកនាំពាក្យម្នាក់​បានប្រាប់​ថា មជ្ឈមណ្ឌលវេជ្ជសាស្ត្រ Northern Light Eastern Maine ក្នុងទីក្រុង Bangor កំពុងព្យាបាលអ្នកជំងឺម្នាក់ដែលស្ថិតក្នុងស្ថានភាពធ្ងន់ធ្ងរ។

រោងចក្រនេះស្ថិតនៅទីក្រុង​ Searsmont ជាទីក្រុងមួយដែលមានមនុស្សប្រហែល ១.៥០០នាក់ នៅចម្ងាយប្រហែល ៩៥ម៉ាយល៍ (១៥០គីឡូម៉ែត្រ) ពីទីក្រុង Portland។ អ្នកឆ្លើយតបបន្ទាន់រដ្ឋ និងមូលដ្ឋានបានជួយដល់​ដំណើរការ​សង្គ្រោះ​ ខណៈដែលនាយកដ្ឋានពន្លត់អគ្គិភ័យ បានចំណាយ​ពេល​ជាច្រើនម៉ោង ដើម្បីទប់ស្កាត់អណ្តាតភ្លើង៕