សេចក្ដី​រាយការណ៍​ពី​ប្រព័ន្ធផ្សព្វផ្សាយ កាលពីថ្ងៃសុក្រ (ទី១៥ ខែឧសភា ឆ្នាំ​២០២៦) បាន​ឲ្យ​ដឹង​ថា រដ្ឋមន្ត្រីក្រសួងសមុទ្ររបស់​ប្រទេស​កូរ៉េខាងត្បូង បង្ហាញ​ការ​ប្រឆាំងនឹងចំណាត់​ការ​របស់អ៊ីរ៉ង់ដែលត្រូវបានរាយការណ៍ថា នឹងយកថ្លៃដឹកជញ្ជូនពី​នាវា​ដែលឆ្លងកាត់ច្រកសមុទ្រដ៏សំខាន់ជាយុទ្ធសាស្ត្រ គឺ​ Hormuz ដោយហៅសកម្មភាពនេះថា ជាការរំលោភលើច្បាប់អន្តរជាតិ។

បើយោងតាមសារព័ត៌មាន ​​Yonhap News បាន​ឲ្យ​ដឹង​ថា អំឡុង​ពេល​ថ្លែងនៅឯ​សន្និសីទសារព័ត៌មាន នៅទីក្រុងកំពង់ផែ Busan ភាគអាគ្នេយ៍ លោក Hwang Jong-woo បាននិយាយថា ផ្លូវទឹក​នេះ គឺជាផ្លូវដឹកជញ្ជូនអន្តរជាតិ ដែលការធ្វើ​នាវាចរណ៍​ដោយសេរី ត្រូវតែទទួល​បាន​ការ​ធានា។

លោក Hwang បាននិយាយថា «ការគិតថ្លៃដឹកជញ្ជូន នៅច្រកសមុទ្រនេះ គឺស្មើនឹងការបិទផ្លូវទឹកនេះ​» ដោយបន្ថែមថា មិនដូចព្រែកជីក Suez ដែល​មនុស្សជាអ្នក​បង្កើត​ឡើង​ ច្រកសមុទ្រ Hormuz មានដែនទឹកអន្តរជាតិដែលត្រូវបានការពារក្រោមកិច្ចព្រមព្រៀងអន្តរជាតិ។

គួរបញ្ជាក់​ថា កាល​ពី​ថ្ងៃពុធ លោក Ebrahim Azizi ប្រធានគណៈកម្មការសន្តិសុខជាតិ និងគោលនយោបាយការបរទេសរបស់សភាអ៊ីរ៉ង់ បាននិយាយថា សំណើយុទ្ធសាស្ត្រ ស្តីពី «ការគ្រប់គ្រងឆ្លាតវៃ» លើ​ច្រកសមុទ្រនេះ បានឈានដល់ដំណាក់កាលចុងក្រោយរបស់ខ្លួន ដែលត្រូវបានបញ្ចូល​ទៅក្នុងប្រព័ន្ធរបស់សភា សម្រាប់ដំណើរការ​ពិនិត្យ និងអនុម័ត។ លោកបានបន្ថែមថា សំណើនេះមានគោលបំណងប្រើប្រាស់ទីតាំងភូមិសាស្ត្ររបស់អ៊ីរ៉ង់ នៅក្នុងផ្លូវទឹកយុទ្ធសាស្ត្រនេះ​ ជា «ការ​មាន​ប្រៀប​បង្កើត​ឥទ្ធិពល​»៕