វិមានក្រឹមឡាំងបានប្រកាសឲ្យ​ដឹង​នៅ​ថ្ងៃសៅរ៍ (ទី១៦ ខែឧសភា ឆ្នាំ២០២៦) នេះ​ថា ប្រធានាធិបតីរុស្ស៊ី លោក Vladimir Putin នឹងទៅ​បំពេញទស្សនកិច្ចជាផ្លូវការនៅប្រទេសចិន នា​ថ្ងៃទី ១៩-២០ ខែឧសភា តាមការអញ្ជើញរបស់ប្រធានាធិបតីចិន លោក Xi Jinping។

យោងតាមសេចក្តីថ្លែងការណ៍របស់វិមានក្រឹមឡាំង បាន​ឲ្យ​ដឹង​ថា លោក Putin និងលោក Xi នឹងពិភាក្សាអំពីទំនាក់ទំនងទ្វេភាគី វិធី​ដើម្បីពង្រឹងភាពជាដៃ និងកិច្ចសហប្រតិបត្តិការយុទ្ធសាស្ត្រគ្រប់ជ្រុង​ជ្រោយ រវាងប្រទេសទាំង២ ព្រម​ទាំង​បញ្ហាអន្តរជាតិ និងតំបន់សំខាន់ៗ។

សេចក្ដី​ថ្លែង​ការណ៍​បានឲ្យ​ដឹង​ទៀត​​ថា មេដឹកនាំទាំង២ ក៏ត្រូវបានគេរំពឹងថា នឹងចុះហត្ថលេខាលើសេចក្តីថ្លែងការណ៍រួមមួយ បន្ទាប់ពីមាន​កិច្ច​ពិភាក្សា​ រួមជាមួយនឹងកិច្ចព្រមព្រៀងទ្វេភាគីជាច្រើន រវាងរដ្ឋាភិបាល អន្តរក្រសួង និងកិច្ចព្រមព្រៀងផ្សេងៗទៀត។

សេចក្តីថ្លែងការណ៍បានបន្ថែម​ថា លោក Putin ក៏នឹងជួបផង​ដែរ​ជាមួយនាយករដ្ឋមន្ត្រីចិន លោក Li Qiang ដើម្បីពិភាក្សាអំពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ច។

គួរ​បញ្ជាក់ថា ដំណើរទស្សនកិច្ចនេះ កើតមាន​ឡើង​ស្របជាមួយនឹងខួបលើកទី២៥ នៃសន្ធិសញ្ញាអ្នកជិតខាងល្អ និងកិច្ចសហប្រតិបត្តិការមិត្តភាព រវាងប្រទេសទាំង២។ លោក Putin និងលោក Xi ក៏នឹង​ចូលរួមផង​ដែរ​ ក្នុងពិធីបើកឆ្នាំសិក្សា​រុស្ស៊ី-ចិន (២០២៦-២០២៧)៕