មេដឹកនាំជាន់ខ្ពស់ម្នាក់នៃក្រុមសកម្មប្រយុទ្ធ ISIS ត្រូវបានសម្លាប់នៅក្នុងប្រតិបត្តិការរួមគ្នារបស់​កងកម្លាំងសហរដ្ឋអាមេរិក និងនីហ្សេរីយ៉ា នៅក្នុងប្រទេសអាហ្វ្រិកខាងលិច។​ នេះបើយោងតាមការឲ្យ​ដឹង​ពី​មេដឹកនាំនៃប្រទេសទាំង២។

ដោយ​ស្ថិត​ក្រោមទណ្ឌកម្មរបស់សហរដ្ឋអាមេរិកចាប់តាំងពីឆ្នាំ២០២៣ លោក Abu-Bilal al-Minuki គឺជាមេបញ្ជាការទី២ របស់រដ្ឋ​ឥស្លាម ISIS ទូទាំងពិភពលោក។ នេះបើយោងតាមប្រធានាធិបតីអាមេរិក លោក Donald Trump និងយោធានីហ្សេរីយ៉ា។

ដំបូងឡើយ លោក Trump បានប្រកាសពីការសម្លាប់នេះ នៅក្នុងការបង្ហោះមួយលើវេទិកាបណ្ដាញ​សង្គម Truth Social ដោយបានបញ្ជាក់​ថា៖ «យប់នេះ តាមការណែនាំរបស់ខ្ញុំ កងកម្លាំងអាមេរិកដ៏ក្លាហាន និងកងកម្លាំងប្រដាប់អាវុធនីហ្សេរីយ៉ា បានអនុវត្តបេសកកម្មដែលបានគ្រោងទុកយ៉ាងហ្មត់ចត់ និងស្មុគស្មាញបំផុត ដើម្បីកម្ចាត់​ភេរវករដ៏​សកម្មបំផុតនៅលើពិភពលោកចេញពីសមរភូមិ»។

យ៉ាងណាក្ដី លោក Trump មិនបានផ្តល់ព័ត៌មានលម្អិតឡើយ​ អំពីទម្រង់នៃការវាយប្រហារ ឬថា តើកងកម្លាំងអាមេរិក បានធ្វើការវាយប្រហារតាមអាកាសដែរ ឬទេ​។

ចំណែក​កងកម្លាំងការពារជាតិនីហ្សេរីយ៉ាបានឲ្យ​ដឹង​ថា លោក Al-Minuki គឺជា «មេដឹកនាំជាន់ខ្ពស់របស់​ ISIS និងជាភេរវករដ៏​សកម្មបំផុតម្នាក់របស់ពិភពលោក» ដោយប្រើឈ្មោះផ្សេងទៀត សម្រាប់ក្រុមជីហាដ​នេះ។

ជា​ការ​បញ្ជាក់អះអាង​ពីការសម្លាប់នេះ ប្រធានាធិបតីនីហ្សេរីយ៉ា លោក​ Bola Tinubu បានប្រាប់​ថា៖ «កងកម្លាំងប្រដាប់អាវុធនីហ្សេរីយ៉ាដ៏ម៉ឺងម៉ាត់របស់យើង ដោយធ្វើការយ៉ាងជិតស្និទ្ធជាមួយកងកម្លាំងប្រដាប់អាវុធសហរដ្ឋអាមេរិក បានធ្វើប្រតិបត្តិការរួមគ្នាដ៏ក្លាហានមួយ ដែលបាន​ផ្ដល់​ការខាតបង់​យ៉ាងធ្ងន់ធ្ងរដល់ក្រុមរដ្ឋឥស្លាម»៕