នៅថ្ងៃសៅរ៍ (ទី១៦ ខែឧសភា ឆ្នាំ២០២៦) នេះ មន្ត្រីជាន់ខ្ពស់ម្នាក់របស់ក្រុម​ហាម៉ាស បានបញ្ជាក់ប្រាប់ទីភ្នាក់​ងារ​សារព័ត៌មាន​ Reuters ថា មេដឹកនាំយោធារបស់​ក្រុម​ហាម៉ាស លោក Izz ad-Din al-Haddad (Haddad) ត្រូវបានសម្លាប់នៅក្នុងការវាយប្រហាររបស់អ៊ីស្រាអែល នៅតំបន់ហ្កាហ្សាស្ទ្រីប កាលពីថ្ងៃសុក្រ។

នាយករដ្ឋមន្ត្រី លោក Benjamin Netanyahu និងរដ្ឋមន្ត្រីក្រសួងការពារជាតិ លោក Israel Katz បានបញ្ជាក់​នៅក្នុងសេចក្តីថ្លែងការណ៍រួមមួយកាលពីល្ងាចថ្ងៃសុក្រថា លោក Haddad ត្រូវបានកំណត់គោលដៅ។ ប្រភពការពារជាតិជាន់ខ្ពស់ បានប្រាប់សារព័ត៌មាន Walla ថា ការចង្អុលបង្ហាញដំបូង ឲ្យ​ដឹង​ថា ការប៉ុនប៉ងធ្វើឃាតនេះទទួលបានជោគជ័យ។ តែ​មិនទាន់មានការបញ្ជាក់ជាផ្លូវការណាមួយនៅឡើយទេ ពី IDF (កងកម្លាំង​ការពារជាតិ​អ៊ីស្រាអែល)។

កងទ័ពអាកាសបានធ្វើការវាយប្រហារនេះ បន្ទាប់ពីទទួលបានព័ត៌មានពីទី​បញ្ជាការភាគខាងត្បូង និងនាយកដ្ឋានស៊ើបការណ៍សម្ងាត់យោធារបស់ IDF ពាក់​ព័ន្ធ​នឹង​ទីតាំងរបស់លោក Haddad ដែលត្រូវបានកំណត់អត្តសញ្ញាណ បន្ទាប់ពីមាន​ការប្រមូលព័ត៌មានស៊ើបការណ៍សម្ងាត់យោធាអស់រយៈពេលជាច្រើនឆ្នាំ។ ហើយ​យោងតាមប្រព័ន្ធផ្សព្វផ្សាយអ៊ីស្រាអែល បាន​ឲ្យ​ដឹង​ថា ការយល់ព្រមត្រូវបានផ្តល់ឲ្យ​ IDF ដោយមន្ត្រីរដ្ឋាភិបាលប្រហែល ១០ថ្ងៃមុន​ការវាយប្រហារនេះ។

ប្រធានប្រតិបត្តិការរបស់​ IDF លោក​ឧត្តមសេនីយ៍ទោ Itzik Cohen បានណែនាំយោធាឲ្យ​ត្រៀមខ្លួន ទាំង​នៅផ្លូវ​គោក​ ​ទឹក​ និងអាកាស បន្ទាប់ពីមាន​ការវាយប្រហារ។

លោក Haddad គឺជាមេបញ្ជាការយោធាជាន់ខ្ពស់បំផុតរបស់ក្រុមហាម៉ាស និងជាមេដឹកនាំនៅសល់​ចុងក្រោយនៃប្រតិបត្តិការ​សម្លាប់រង្គាលកាល​ពី​ថ្ងៃទី៧ ខែតុលា ឆ្នាំ​២០២៣ នៅតំបន់ហ្កាហ្សាស្ទ្រីប។ លោក​គឺ​ជាសមាជិកនៃអង្គភាព​យោធារបស់ក្រុមភេរវកម្ម ចាប់តាំងពីការបង្កើតឡើងដំបូងរបស់អង្គការ​នេះ​ក្នុងឆ្នាំ១៩៨៧៕