ប្រធានាធិបតីអាមេរិក លោក Donald Trump បានចេញការព្រមានថ្មីមួយដល់អ៊ីរ៉ង់កាលពី​​ថ្ងៃអាទិត្យ១៧​​​ ឧសភា​សប្ដាហ៍នេះ​​ ដោយនិយាយថា អ៊ីរ៉ង់​ត្រូវតែបោះជំហាន​យ៉ាងឆាប់រហ័សឆ្ពោះទៅរកកិច្ចព្រមព្រៀងសន្តិភាព បើពុំនោះ​​ នឹងមិនមានអ្វីនៅសល់សម្រាប់​ពួកគេ​​ឡើយ​។

ទីក្រុងវ៉ាស៊ីនតោន ដែលជាប់គាំងនៅក្នុងជម្លោះជាមួយទីក្រុងតេអេរ៉ង់ចាប់តាំងពីកងកម្លាំងអាមេរិក និងអ៊ីស្រាអែលបានបើកការវាយប្រហារដ៏ខ្លាំងក្លា​​លើសាធា​រណរដ្ឋអ៊ីស្លាមមួយនេះ​ ចាប់ពីថ្ងៃទី២៨ កុម្ភៈ ២០២៦​ ​ បានតស៊ូដើម្បីបំបែកភាពជាប់គាំង និងធ្វើឱ្យមានវឌ្ឍនភាពណាមួយឆ្ពោះទៅរកការបញ្ចប់សង្គ្រាមដែលបានធ្វើឱ្យមជ្ឈិមបូព៌ារង្គោះរង្គើ និងបណ្ដា​​ល​​​ឱ្យតម្លៃថាមពលសកល​​កើនឡើង។

លោក Trump បានសរសេរនៅលើបណ្ដាញ​​សង្គម​​ Truth Social របស់លោក​​​​​​ថា សម្រាប់អ៊ីរ៉ង់ ពេលវេលាកំពុង​​ដើរទៅមុខ​​ ​ហើយពួកគេគួរតែធ្វើ​សកម្មភាព​​ឲ្យបាន​លឿនបំផុត​ ពុំ​នោះ​ នឹង​មិនមានអ្វីនៅសល់សម្រាប់ពួកគេ​ឡើយ​​។ ពេលវេលាគឺជារឿងសំខាន់!។ ​

សង្គ្រាមនេះបាននាំឱ្យមានការបិទច្រកសមុទ្រ Hormuz ដ៏សំខាន់ ដែលជា​ផ្លូវ​​ទឹក​សម្រាប់ការនាំចេញប្រេងសកល​ ប្រហែល ២០​​ ភាគរយ​មុនពេល​មាន​សង្គ្រាម​​ ហើយបានទាញប្រទេសជិតខាង ​គឺអ៊ីស្រាអែល និងលីបង់ ​ ​ធ្លាក់​ចូល​​​ក្នុងជម្លោះដ៏បង្ហូរឈាម​​​។​

រដ្ឋ​ក្រុមមេដឹកនាំ​​សាសនា​អ៊ីរ៉ង់ ​ដែល​ជា​អ្នកគាំទ្រ​​​​​របស់​ក្រុម​ហេសបូឡា បាន​ទាមទារ​ឲ្យ​មាន​បទ​ឈប់​បាញ់​ជា​អចិន្ត្រៃយ៍​នៅ​លីបង់ មុន​ពេល​មាន​កិច្ចព្រមព្រៀង​សន្តិភាព​ទូលំទូលាយ​ជាមួយ​លោក Trump ដែល​មាន​ការ​ខកចិត្ត​ដោយសារ​ការ​បដិសេធ​របស់​ទីក្រុង​តេអេរ៉ង់​ក្នុង​ការ​ទទួលយក​កិច្ចព្រមព្រៀង​តាម​លក្ខខណ្ឌ​របស់​លោក៕