សេតវិមានបាននិយាយនៅក្នុងឯកសារ​ព័ត៌មាន​​​​​​​​មួយ​ចេញផ្សាយកាលពី​​ថ្ងៃអាទិត្យ ១៧ ឧសភា ថា ប្រទេសចិន បា​​នប្តេជ្ញា​​ទិញផលិតផលកសិកម្មរបស់សហរដ្ឋអាមេរិកយ៉ាងហោចណាស់ ១៧ ពាន់លានដុល្លារនៅឆ្នាំ ២០២៦ ​ ២០២៧ និង ២០២៨។

ការប្តេជ្ញាចិត្តនេះត្រូវបានធ្វើឡើងក្នុងអំឡុងពេលកិច្ចប្រជុំរវាងប្រធានាធិបតីសហរដ្ឋអាមេរិក លោក Donald Trump​​ និងប្រធានាធិបតីចិន លោក Xi Jinping កាលពីសប្តាហ៍មុន។ ​​

សេតវិមានបាននិយាយថា តួលេខ ១៧ ពាន់លានដុល្លារអាមេរិកមិនរាប់បញ្ចូលការប្តេជ្ញាចិត្តទិញសណ្តែកសៀងដែលប្រទេសចិនបានធ្វើនៅក្នុងខែតុលា ឆ្នាំ ២០២៥ ទេ។

យោងតាមទិន្នន័យរបស់ក្រសួងកសិកម្មសហរដ្ឋអាមេរិក មានការថយចុះគួរឱ្យកត់សម្គាល់នៃការនាំចេញផលិតផលកសិកម្មរបស់សហរដ្ឋអាមេរិកទៅកាន់ប្រទេសចិន បន្ទាប់ពីការដំឡើង​​ពន្ធ​​សងសឹកគ្នាកាលពីឆ្នាំមុន បានកាត់បន្ថយយ៉ាងខ្លាំងលើ​​​​ទំហំ​ពាណិជ្ជកម្ម ដែលបានធ្លាក់ចុះ ៦៥,៧ ភាគរយធៀបនឹងឆ្នាំមុន ​មកនៅត្រឹម ៨,៤ ពាន់លានដុ​ល្លារអាមេរិកនៅឆ្នាំ ២០២៥ ។​ ​​

ប្រទេសចិនបានកាត់បន្ថយការពឹងផ្អែករបស់ខ្លួនលើទំនិញកសិកម្មរបស់សហរដ្ឋអាមេរិកយ៉ាងខ្លាំងចាប់តាំងពីអាណត្តិដំបូងរបស់លោក Trump ដោយមានប្រភពសណ្តែកសៀងប្រហែល ២០​ ​ ភាគរយពីសហរដ្ឋអាមេរិកក្នុងឆ្នាំ ២០២៤​​ មួយឆ្នាំមុនពេលលោកវិលត្រឡប់ទៅ​​កាន់តំណែងវិញ ធ្លាក់ចុះពី ៤១ ភាគរយក្នុងឆ្នាំ ២០១៦​ ៕