ទីភ្នាក់ងារសារព័ត៌មានរដ្ឋរុស្ស៊ី TASS បានរាយការណ៍កាលពីថ្ងៃអាទិត្យ ​​​​១៧​​ឧសភា ​​ ដោយដកស្រង់សម្តីមន្ត្រីមូលដ្ឋាន និងយោធា​ថា មនុស្ស​៤​នាក់បានស្លាប់​ រួមទាំងបីនាក់ក្នុងតំបន់ទីក្រុង​​មូស្គូ បន្ទាប់ពីអ៊ុយក្រែនបានកំណត់គោលដៅលើរុស្ស៊ីដោយ​​យានដ្រូន​ជាង ៥០០ គ្រឿង នៅពេល​យប់​។

អាជ្ញាធរមូលដ្ឋាននិយាយថា មនុស្សទីបួន​បានស្លាប់ក្នុងតំបន់ Belgorod ​មានព្រំប្រទល់ជាប់ភាគឦសានអ៊ុយក្រែន ខណៈក្រសួងការពារជាតិរុស្ស៊ីនិយាយថា នៅ​ពាក់កណ្តាលថ្ងៃត្រង់​​យានដ្រូនអ៊ុយក្រែនជាង ១.០០០ គ្រឿងត្រូវបានបាញ់ទម្លាក់នៅលើប្រទេសនេះ​ក្នុងរយៈពេល ២៤ ម៉ោងកន្លងមក។

ប្រធានាធិបតីអ៊ុយក្រែន Volodymyr Zelenskyy បានសន្យាថានឹងសងសឹកកាលពីថ្ងៃសុក្រសប្ដាហ៍មុន​ បន្ទាប់ពីការវាយប្រហារដោយយានដ្រូន និងមីស៊ីលដ៏ខ្លាំងក្លាបំផុតរបស់រុស្ស៊ីទៅលើទីក្រុងគីវក្នុងរយៈពេលពីរថ្ងៃចាប់តាំងពីសង្គ្រាមបានចាប់ផ្តើមជាងបួនឆ្នាំមុន។​ដោយបញ្ជាក់ពីការវាយប្រហារនេះលោកZelenskyy បានបង្ហោះវីដេអូមួយអំពីយានដ្រូនមួយ​គ្រឿង​កំពុងហោះហើរ ផ្សែងខ្មៅ និងក្រុមពន្លត់អគ្គិ​​ភ័យកំពុងព្យាយាមពន្លត់អណ្តាតភ្លើង។​

លោក Zelenskyy បាននិយាយថា ការឆ្លើយតបរបស់ពួកលោក​​​ចំពោះការអូសបន្លាយសង្គ្រាមរបស់រុស្ស៊ី និងការវាយប្រហាររបស់ខ្លួនទៅលើទីក្រុង និងសហគមន៍របស់ពួកលោក ​គឺត្រឹមត្រូវទាំងស្រុង។លោកបន្ថែមថា អ៊ុយក្រែន ​អាចវាយប្រហារគោលដៅចម្ងាយជាង ៥០០ គីឡូម៉ែត្រពីព្រំដែន ទោះបីជាមានការការពារដែនអាកាសរបស់រុស្ស៊ីយ៉ាងខ្លាំង​នៅជុំវិញទីក្រុងមូស្គូក៏ដោយ។​

យោងតាមសារព័ត៌មាន​ ​​TASS ដោយដកស្រង់ប្រភព​ព័ត៌មានពី​​អភិបាលក្រុង ការវាយប្រហារលើទីក្រុងមូស្គូនេះគឺជា ​ការវាយប្រហារដ៏ធំបំផុតក្នុងរយៈពេលជាងមួយឆ្នាំ ហើយកើតឡើងបន្ទាប់ពីរលកដ៏ធំនៃការវាយប្រហាររបស់រុស្ស៊ីកាលពីដើមសប្តាហ៍មុន​ ​ដែលកំណត់គោលដៅលើ​​​រដ្ឋធានីគី​វរបស់អ៊ុយក្រែន។យោងតាមអាជ្ញាធរអ៊ុយក្រែន ​​ការវាយប្រហាររបស់​រុស្ស៊ី​ ទាំងនោះបានសម្លាប់មនុស្ស ២៥ នាក់ និងរាប់សិបនាក់ផ្សេងទៀតរងរបួស៕