គណៈរដ្ឋមន្ត្រីអ៊ីស្រាអែល កាលពីថ្ងៃអាទិត្យ បានអនុម័តផែនការសាងសង់ការិយាល័យការពារជាតិនៅលើទីតាំងរបស់ទីភ្នាក់ងារសង្គ្រោះនិងការងាររបស់អង្គការសហប្រជាជាតិ ដែលត្រូវបានរុះរើកាលពីពេលថ្មីៗនេះ នៅក្នុងទីក្រុងហ្សេរុយសាឡឹមខាងកើត។

កាលពីខែមករា អ៊ីស្រាអែល បានរុះរើរចនាសម្ព័ន្ធនៅខាងក្នុងទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ នៅទីក្រុងហ្សេរុយសាឡឹមខាងកើត បន្ទាប់ពីបានរឹបអូសទីតាំងនោះកាលពីឆ្នាំមុន ជាចំណាត់ការមួយដែលត្រូវបានថ្កោលទោសដោយទីភ្នាក់ងារនេះ ថាជាការរំលោភលើច្បាប់អន្តរជាតិ។ នៅក្នុងសេចក្តីថ្លែងការណ៍រួម ក្រសួងការពារជាតិ និងទីក្រុងយេរូសាឡឹម បាននិយាយថា បរិវេណថ្មីនេះនឹងរួមបញ្ចូលការបង្កើតសារមន្ទីរយោធា ការិយាល័យជ្រើសរើសបុគ្គលិក និងការិយាល័យរដ្ឋមន្ត្រីការពារជាតិ។

ទីភ្នាក់ងារ UNRWA ដែលអាជ្ញាធរអ៊ីស្រាអែល បានចោទប្រកាន់ពីភាពលំអៀង មិនបានប្រើប្រាស់អគារនេះទេ ចាប់តាំងពីដើមឆ្នាំមុន បន្ទាប់ពីអ៊ីស្រាអែល បានបញ្ជាឱ្យភ្នាក់ងារចាកចេញពីបរិវេណទាំងអស់របស់ខ្លួន និងបញ្ឈប់ប្រតិបត្តិការ។ អ្នកនាំពាក្យទីភ្នាក់ងារ UNRWA បានបដិសេធមិនធ្វើអត្ថាធិប្បាយលើផែនការរបស់អ៊ីស្រាអែលនោះទេ។ ទីភ្នាក់ងារនេះ បានធ្វើប្រតិបត្តិការនៅភាគខាងកើតទីក្រុងហ្សេរុយសាឡឹម ដែលអង្គការសហប្រជាជាតិ និងប្រទេសភាគច្រើន ចាត់ទុកថាជាដែនដីដែលចូលកាន់កាប់ដោយអ៊ីស្រាអែល ខណៈទីក្រុងនេះត្រូវបានដណ្តើមយកពីប្រទេសហ្ស៊កដានី ក្នុងសង្គ្រាមមជ្ឈិមបូព៌ា ឆ្នាំ ១៩៦៧។ អ៊ីស្រាអែល បានចាត់ទុកទីក្រុងហ្សេរុយសាឡឹមទាំងមូលថាជារដ្ឋធានី ដែលមិនអាចបែងចែកបានរបស់ខ្លួន។ ទីភ្នាក់ងារ UNRWA បានធ្វើប្រតិបត្តិការនៅតំបន់ហ្កាហ្សា តំបន់ West Bank និងកន្លែងផ្សេងទៀតនៅមជ្ឈិមបូព៌ា ដោយផ្តល់ការអប់រំ ការថែទាំសុខភាព សេវាសង្គម និងទីជម្រកដល់ប្រជាជនប៉ាឡេស្ទីន រាប់លាននាក់។