អគ្គលេខាធិការណាតូ លោក Mark Rutte មានគម្រោងដាក់សម្ពាធលើសាជីវកម្ម និងភ្នាក់ងារការពារជាតិអឺរ៉ុបនៅក្នុងកិច្ចប្រជុំមួយនៅទីក្រុងប្រ៊ុចសែល ដោយបញ្ចុះបញ្ចូលពួកគេឲ្យជំរុញការផលិត ដើម្បីផ្គាប់ចិត្តប្រធានាធិបតីអាមេរិក លោក ដូណាល់ ត្រាំ (Donald Trump)។ នេះបើយោងតាមរបាយការណ៍របស់ កាសែត Financial Times (FT)។

មន្ត្រីណាតូម្នាក់ បាននិយាយថា៖«លោកអគ្គលេខាធិការតែងតែជួបជាមួយឧស្សាហកម្ម និងស្ថាប័នហិរញ្ញវត្ថុមកពីទូទាំងសម្ព័ន្ធមិត្ត ដើម្បីលើកទឹកចិត្តដល់ការបង្កើនផលិតកម្ម នវានុវត្តន៍ និងការវិនិយោគ ដើម្បីបំពេញតម្រូវការសមត្ថភាពរបស់យើង»។

យោងតាមសារព័ត៌មាននេះ សម្ព័ន្ធយោធាអាត្លង់ទិកខាងជើងចាប់អារម្មណ៍លើឧស្សាហកម្មអឺរ៉ុប ក្នុងការជួយបំពេញតម្រូវការរបស់ទីក្រុងវ៉ាស៊ីនតោនសម្រាប់ការបង្កើនការចំណាយលើការការពារជាតិ ដើម្បីកាត់បន្ថយ«កំហឹង» របស់លោក ត្រាំ ចំពោះអសមត្ថភាពរបស់សម្ព័ន្ធមិត្តក្នុងការគាំទ្រសហរដ្ឋអាមេរិក នៅក្នុងជម្លោះនៅមជ្ឈិមបូព៌ា។

កាសែតនេះបានរាយការណ៍ថា តំណាងក្រុមហ៊ុន Rheinmetall, Safran, Airbus, Saab, MBDA និង Leonardo នឹងមានវត្តមាននៅក្នុងកិច្ចប្រជុំ។ បន្ថែមពីលើការបង្កើនចំនួនរោងចក្រ និងបុគ្គលិក ដើម្បីបង្កើនផលិតភាព ការយកចិត្តទុកដាក់ជាពិសេស នឹងផ្តោតទៅលើការពិភាក្សាអំពីបញ្ហាការពារដែនអាកាស និងមីស៊ីលរយៈចម្ងាយឆ្ងាយ៕