យ៉ាងហោចណាស់មនុស្ស ៥នាក់ ក្នុងនោះមានកុមារពីរនាក់ ត្រូវបានសម្លាប់ និង ១៥ នាក់ផ្សេងទៀតរងរបួស កាលពីថ្ងៃអាទិត្យ ខណៈដែលការវាយប្រហាររបស់អ៊ីស្រាអែលកាន់តែខ្លាំងឡើងនៅទូទាំងភាគខាងត្បូងប្រទេសលីបង់។ នេះបើយោងតាមប្រភពព័ត៌មានលីបង់។

មជ្ឈមណ្ឌលប្រតិបត្តិការសង្គ្រោះបន្ទាន់សុខភាពសាធារណៈរបស់ក្រសួងសុខាភិបាលលីបង់ បាននិយាយថា មនុស្សបីនាក់ ក្នុងនោះកុមារម្នាក់ ត្រូវបានសម្លាប់ និង ៨នាក់ ផ្សេងទៀត ចំណោមនោះមានកុមារបីនាក់ បានរងរបួស ក្នុងការវាយប្រហាររបស់អ៊ីស្រាអែល ទៅលើទីក្រុង Tayr Felsay។

មនុស្សពីរនាក់បានស្លាប់ និងបីនាក់ផ្សេងទៀតរងរបួស ក្នុងការវាយប្រហាររបស់អ៊ីស្រាអែលទៅលើភូមិ Tayr Debba។ យោងតាមទីភ្នាក់ងារសារព័ត៌មានជាតិលីបង់ គ្រូពេទ្យសង្គ្រោះជាច្រើននាក់ ស្ថិតក្នុងចំណោមអ្នករងរបួស។

មជ្ឈមណ្ឌលនេះ បាននិយាយថា មនុស្សពីរនាក់បានរងរបួស ក្នុងការវាយប្រហារទៅលើទីក្រុង Zrariyeh និងពីរនាក់ផ្សេងទៀត បានរងរបួស ក្នុងការវាយប្រហារទៅលើភូមិ Jibchit។

ទន្ទឹមនឹងនេះ ការផ្ទុះម្តងហើយម្តងទៀត បានធ្វើឲ្យរញ្ជួយទីក្រុងព្រំដែន Khiam។ យន្តហោះចម្បាំងអ៊ីស្រាអែលក៏បានធ្វើការវាយប្រហារចំនួនពីរលើកលើទីក្រុង Sohmor នៅភាគខាងកើតប្រទេសលីបង់ ហើយយានដ្រូនឈ្លបយកការណ៍របស់អ៊ីស្រាអែលត្រូវបានគេរាយការណ៍ថា បានហោះហើរនៅរយៈកម្ពស់ទាបពីលើទីក្រុងបេរូត និងតំបន់ជាយក្រុងនេះ៕