កំពត៖ កាលពីរសៀលថ្ងៃទី១៣ ខែឧសភា ឆ្នាំ២០២៦ ឯកឧត្តម ម៉ៅ ធនិន ប្រធានគណៈបញ្ជាការឯកភាពរដ្ឋបាលខេត្តកំពត បានដឹកនាំកម្លាំងចម្រុះចុះពិនិត្យ និងឆែកឆេរទីតាំងឃ្លាំងសិប្បកម្មវេចខ្ចប់ខុសច្បាប់មួយកន្លែងស្ថិត ក្នុងភូមិកំពង់ត្នោត ឃុំកូនសត្វ ស្រុកទឹកឈូ ខេត្តកំពត និងរកឃើញភស្តុតាងនៃបទល្មើសដោយម្ចាស់ទីតាំងបាន លួចបន្លំដោយផ្ទេរស្ករសពីសម្បកបាវដែលមានអក្សរថៃ ទៅសម្បកបាវអក្សរវៀតណាម ដើម្បីបំភាន់ភ្នែកសមត្ថកិច្ច និងបន្លំប្រភពទំនិញនៅលើទីផ្សារ។

បើតាមរបាយការណ៍ដែលទើបទទួលបានពីកម្លាំងអាវុធហត្ថខេត្តកំពតបានឲ្យដឹងថា ក្រោយការឆែកឆេររកឃើញ ១.ស្ករសចំនួន៥៤០បាវ មានទម្ងន់២៧តោន និងស្ករសចំនួន១១យោង ស្មើនឹង១១០បាវ មានទម្ងន់៥.៥តោន ដែលបាវនីមួយៗមានអក្សរថៃ(មិនទាន់ប្ដូរសំបកបាវ) ។ ២.ស្ករសចំនួន៧២យោង ស្មើនិងចំនួន៧២០បាវ មានទម្ងន់៣៦តោន បានប្តូរសំបកបាវទៅជាបាវអក្សរវៀតណាមរួច ៣.រថយន្តចំនួន០២គ្រឿង (ម៉ាកហ៊ឺយ៉ន់ដាយចំនួន០១គ្រឿងពណ៍ស លាយខៀវ ពាក់ផ្លាកលេខកំពង់ចាម 3A.6964 កន្ទុយសណ្ដោង ពាក់ផ្លាកលេខ កំពង់ចាម 4A.0261 និងម៉ាកហ៊ឺយ៉នដាយចំនួន០១គ្រឿង ពណ៍បៃតង ពាក់ផ្លាកលេខ ព្រះសីហនុ 3A.3616 កន្ទុយសណ្ដោង ពាក់ផ្លាកលេខ ព្រះសីហនុ 4A.2056 ៤.សំបកបាវអក្សរវៀតណាម មួយចំនួនធំ និងសម្ភារៈផ្សេងៗទៀតមួយចំនួន។

ចំណែកមេការ កម្មករ និងអ្នកបើករថយន្តចំនួន ៣២នាក់ត្រូវបានអនុញ្ញាតឲ្យវិលត្រឡប់ទៅគេហដ្ឋានវិញ បន្ទាប់ពីបានសួរនាំនៅហ្នឹងឃ្លាំងរួចរាល់ ។ 

បច្ចុប្បន្ន ទីតាំងឃ្លាំងខាងលើត្រូវបានបិទខ្ទប់ជាបណ្ដោះអាសន្ម ចំណែកអ្នកពាក់ព័ន្ធកម្លាំងអាវុធហត្ថខេត្តកំពត កំពុងស្រាវជ្រាវ ដើម្បីចាត់ការតាមនីតិវិធី៕