អ៊ុយក្រែន៖ ក្រុមមន្ត្រីជាន់ខ្ពស់របស់អ៊ុយក្រែនបាននិយាយកាលពីថ្ងៃអាទិត្យថា កងកម្លាំងអ៊ុយក្រែនដែលត្រូវរងការឡោមព័ទ្ធក្នុងទីក្រុង Mariupol បានច្រានចោលការទាមទាររបស់រុស្ស៊ីឲ្យទម្លាក់អាវុធចុះប្រគល់ខ្លួន និងនៅតែបន្តតស៊ូប្រយុទ្ធរហូតដល់ទីបញ្ចប់ការពារទីក្រុងកំពង់ផែភាគអាគ្នេយ៍។
លោកនាយករដ្ឋមន្ត្រីអ៊ុយក្រែន Denys Shmyhal បាននិយាយថា ទីក្រុងដែលត្រូវបានស្ថិតក្រោមការឡោមព័ទ្ធដោយទាហានរុស្ស៊ីចាប់តាំងពីថ្ងៃទី១ ខែមីនាមកមិនទាន់ដួលរលំទេ។ ទាហានអ៊ុយក្រែនដែលបានជាប់នៅក្នុងទីក្រុងនេះកំពុងប្រយុទ្ធជាមួយកងកម្លាំងរុស្ស៊ី ទោះបីជាកម្លាំងពួកគេមិនដល់ខាងរុស្ស៊ីក៏ដោយ។ លោក Shmyhal បាននិយាយក្នុងកម្មវិធីសប្ដាហ៍នេះរបស់ទូរទស្សន៍ព័ត៌មាន ABC News ថា យើងនៅតែមានកងកម្លាំងយោធារបស់យើង និងទាហានរបស់យើង ដូច្នេះពួកគេនឹងប្រយុទ្ធរហូតដល់ទីបញ្ចប់ ខណៈដែលពួកគេកំពុងស្ថិតនៅក្នុងទីក្រុង Mariupol ក៏ដោយ។
ទីប្រឹក្សាមួយរូបរបស់អភិបាលក្រុង Mariupol ក៏បានច្រានចោលឱសានវាទកំណត់ដោយរុស្ស៊ីផងដែរកាលពីព្រឹកថ្ងៃអាទិត្យ។ រុស្ស៊ីនិយាយថា ទាហានរបស់ខ្លួនបានបោសសម្អាតតំបន់ជាយក្រុងដ៏សំខាន់មួយនៃទីក្រុង Mariupol និងនៅសល់តែក្រុមអ្នកប្រយុទ្ធអ៊ុយក្រែនមួយក្រុមតូចប៉ុណ្ណោះ ដែលនៅតែបន្តសំងំនៅក្នុងរោងចក្រផលិតដែកថែបនៅក្នុងទីក្រុងកំពង់ផែភាគខាងត្បូងដែលរងការឡោមព័ទ្ធ។ ភាគីរុស្ស៊ីបន្ថែមថា កងកម្លាំងអ៊ុយក្រែនចំនួន ១,៤៦៤នាក់បានទម្លាក់អាវុធចុះចាញ់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
