អេមីរ៉ាតអារ៉ាប់រួម កាតា និងគូវ៉ែត នៅថ្ងៃចន្ទ (ទី១៨ ខែឧសភា ឆ្នាំ២០២៦) បានថ្កោលទោសចំពោះការវាយប្រហារដាក់កំណត់គោលដៅលើប្រទេសអារ៉ាប៊ីសាអ៊ូឌីត ដោយប្រើប្រាស់យានដ្រូនដែលបានចូលទៅក្នុងដែនអាកាសរបស់ព្រះរាជាណាចក្រមួយនេះ ដោយចេញពីអ៊ីរ៉ាក់។
អាជ្ញាធរអារ៉ាប៊ីសាអ៊ូឌីត បានឲ្យដឹងកាលពីថ្ងៃអាទិត្យថា ប្រព័ន្ធការពារដែនអាកាសបានស្ទាក់ចាប់ និងបំផ្លាញយានដ្រូនចំនួន ៣គ្រឿង ដែលចេញពីអ៊ីរ៉ាក់។ ក្រសួងការបរទេសអារ៉ាប់រួមបានលើកឡើងនៅក្នុងសេចក្តីថ្លែងការណ៍មួយថា៖ «ការវាយប្រហារទាំងនេះគឺជាការរំលោភលើអធិបតេយ្យភាពនៃព្រះរាជាណាចក្របងប្អូនអារ៉ាប៊ីសាអ៊ូឌីត និងជាការគំរាមកំហែងដល់សន្តិសុខ និងស្ថិរភាពរបស់ប្រទេសនេះ»។
ក្រសួងបានបង្ហាញពី «សាមគ្គីភាពពេញលេញរបស់អារ៉ាប់រួមជាមួយអារ៉ាប៊ីសាអ៊ូឌីត និងការគាំទ្រ ចំពោះវិធានការទាំងអស់ដែលមានគោលបំណងការពារសន្តិសុខ និងស្ថិរភាពរបស់ខ្លួន»។
ចំណែកក្រសួងការបរទេសកាតាក៏បានថ្កោលទោសការវាយប្រហារនេះផងដែរ ដោយចាត់ទុកថា ជា «ការរំលោភលើអធិបតេយ្យភាពរបស់ព្រះរាជាណាចក្រមួយ និងជាការគំរាមកំហែងដល់សន្តិសុខ និងសុវត្ថិភាពរបស់ប្រទេស និងដល់សន្តិសុខរបស់តំបន់»។
រីឯគូវ៉ែតក៏បានសម្តែង «ការថ្កោលទោសយ៉ាងខ្លាំង និងការបរិហារផងដែរ ចំពោះការឈ្លានពាន» លើទឹកដីអារ៉ាប៊ីសាអ៊ូឌីត ដែលចេញពីប្រទេសអ៊ីរ៉ាក់។ ក្រសួងការបរទេសបានរៀបរាប់ថា ការវាយប្រហារនេះបានក្លាយជា «ការបន្តយ៉ាងច្បាស់ក្រឡែតនៃការរំលោភបំពានច្បាប់អន្តរជាតិ និងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ជាពិសេសសេចក្តីសម្រេចលេខ ២៨១៧ ដែលធ្វើឲ្យប៉ះពាល់ដល់សន្តិសុខ និងស្ថិរភាពក្នុងតំបន់»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
