បុគ្គលិកសុខាភិបាល នៅថ្ងៃចន្ទ (ទី១៨​ ខែឧសភា ឆ្នាំ២០២៦) នេះ បាន និង​កំពុងប្រញាប់ប្រញាល់ទៅកាន់ជួរមុខដែល​ផ្ទុះឡើងនូវ​ជំងឺអេបូឡាថ្មី នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ ដែលការរកឃើញយឺត​​ និងការរីករាលដាលយ៉ាងឆាប់រហ័សរបស់វា បានធ្វើឲ្យ​អ្នកជំនាញសុខភាពប្រកាស​អាសន្ន​។

អង្គការសុខភាពពិភពលោក (WHO) កាលពី​ថ្ងៃទី១៧ ខែឧសភា បានប្រកាសពីការផ្ទុះឡើងនូវ​ជំងឺនេះជាភាព​អាសន្នសុខភាពសាធារណៈដែលជាក្ដី​បារម្ភអន្តរជាតិ ដោយសារតែហានិភ័យខ្ពស់ដែលជំងឺនេះ អាចរីករាលដាលបន្ថែមទៀត ហួសពីព្រំដែនរបស់កុងហ្គោ បន្ទាប់ពី ២ករណីត្រូវបានបញ្ជាក់នៅក្នុងទីក្រុង Kampala រដ្ឋធានីនៃប្រទេសជិតខាងអ៊ូហ្គង់ដា។

ការផ្ទុះឡើងនូវ​ជំងឺនេះត្រូវបានគេសង្ស័យថា បានសម្លាប់មនុស្សប្រហែល ៨០​នាក់ ក្នុងរយៈពេលប៉ុន្មានសប្តាហ៍ថ្មីៗនេះ ដោយករណីចំនួន ៨ ត្រូវបានបញ្ជាក់ដោយការធ្វើតេស្តមន្ទីរពិសោធន៍ និងករណីសង្ស័យ ២៤៦នាក់​ ត្រូវបានរាយការណ៍នៅក្នុងខេត្ត Ituri ភាគខាងកើតកុងហ្គោ។

ករណីមួយទៀតត្រូវបានបញ្ជាក់នៅក្នុងរដ្ឋធានី Goma របស់​ខេត្ត North Kivu។ នេះបើយោងតាមក្រុមឧទ្ទាម M23 ដែលគ្រប់គ្រងទីក្រុងនេះ។

គណៈប្រតិភូមួយក្រុមដឹកនាំដោយលោក Samuel Roger Kamba រដ្ឋមន្ត្រីក្រសួងសុខាភិបាលកុងហ្គោ បានទៅ​ដល់រដ្ឋធានី Bunia របស់​ខេត្ត Ituri នៅថ្ងៃទី១៧ ខែឧសភា ដោយ​តង់ត្រូវបាន​បង្កើតឡើង ដើម្បី​ធ្វើជា​មណ្ឌលព្យាបាល ជា​ការ​គាំទ្រដល់មន្ទីរពេទ្យមូល​ដ្ឋាន​ដែលមានស្ថានភាពលំបាក។ លោកស្រី Anne Ancia តំណាង WHO ប្រចាំនៅ​កុងហ្គោ បាននិយាយថា WHO បានប្រើ​ប្រាស់​ឧបករណ៍ការពារខ្លួនអស់ពីស្តុក​ហើយ នៅក្នុងរដ្ឋធានី Kinshasa ហើយឥឡូវនេះកំពុងរៀបចំយន្តហោះដឹកទំនិញ ១គ្រឿង ដើម្បីនាំយកសម្ភារៈបន្ថែមពីឃ្លាំងមួយ នៅ​ក្នុងប្រទេសកេនយ៉ា។

គួរ​បញ្ជាក់ថា ការផ្ទុះឡើងថ្មី​ៗ​នេះ បណ្តាលមកពីក្រុម​វីរុស​ Bundibugyo ដែលមិនដូចប្រភេទវីរុសអេបូឡា Zaire ទូទៅនោះទេ មិនមានការព្យាបាលវីរុស​ជាក់លាក់ ឬវ៉ាក់សាំងដែលត្រូវបានអនុម័តឡើយ​៕