នាយករដ្ឋមន្ត្រីជប៉ុន លោកស្រី​ Sanae Takaichi នៅ​ថ្ងៃចន្ទ (ទី​១៨ ខែឧសភា ឆ្នាំ២០២៦) នេះ បានសង្កត់ធ្ងន់ថា ការគាំទ្ររបស់ទីក្រុងតូក្យូ ចំពោះពហុភាគីនិយម ដែលមានអង្គការសហប្រជាជាតិ (UN) ជាស្នូល នៅតែមិនមាន​ការ​ផ្លាស់ប្តូរដដែល​ ដោយ​ការ​លើក​ឡើង​កើតមាន​ក្នុងអំឡុងពេលមាន​ជំនួប​ជាមួយអគ្គលេខាធិការ UN លោក​ Antonio Guterres នៅក្នុងរដ្ឋធានីរបស់ប្រទេស​ជប៉ុន។

សារព័ត៌មាន​ Jiji Press បាន​រាយការណ៍​ថា លោក Guterres បានសរសើរកិច្ចប្រឹងប្រែងរបស់ជប៉ុន ក្នុងកិច្ចសហប្រតិបត្តិការអភិវឌ្ឍន៍ និងការមិនរីកសាយភាយអាវុធនុយក្លេអ៊ែរ ដោយកត់សម្គាល់ថា អំណាចសីលធម៌របស់ប្រទេសនេះ គឺ «មានសារៈសំខាន់ខ្លាំងណាស់»។ ប្រមុខ UN កំពុងបំពេញទស្សនកិច្ចនៅប្រទេសជប៉ុន ចាប់ពីថ្ងៃអាទិត្យ ដល់ថ្ងៃពុធ។

នៅព្រឹក​ថ្ងៃនេះ លោក Guterres បានថ្លែងសុន្ទរកថានៅក្នុងព្រឹត្តិការណ៍មួយដែលមានចំណងជើងថា អបអរសាទរខួបលើកទី៧០​ កិច្ចសហប្រតិបត្តិការជប៉ុន-UN ពិព័រណ៍ឆ្នាំ២០២៥ និងអនាគតនៃពហុភាគីនិយម ដែល​អំឡុង​ពេល​នោះ​លោកក៏បានសង្កត់ធ្ងន់លើសារៈសំខាន់នៃពហុភាគីនិយមផងដែរ។

លោកបានសង្កត់ធ្ងន់លើតម្រូវការ ក្នុងការធ្វើឲ្យ​ពហុភាគីនិយម អាចមើលឃើញនៅក្នុងសកម្មភាព សម្រាប់ប្រជាជន ក៏ដូចជាសារៈសំខាន់នៃទំនាក់ទំនង ភាពជាដៃគូ និងការកំណត់​អនាគត តាមរយៈការសហការបង្កើត។

លោក Guterres បានបន្ថែម​ថា៖ «អនាគតនៃពហុភាគីនិយម នឹងត្រូវបានធានាដោយភាពក្លាហាន កំណែទម្រង់ និងការផ្តល់ឲ្យ​។ វានឹងតម្រូវឲ្យ​មានស្ថាប័នដែលឆ្លុះបញ្ចាំងពីពិភពលោកសព្វថ្ងៃនេះ មិនមែនពិភពលោកកាលពី ៨០​ឆ្នាំមុននោះទេ។ វានឹងតម្រូវឲ្យ​មានហិរញ្ញប្បទានដែលត្រូវនឹងមហិច្ឆតា»៕