ប្រធានាធិបតីអាមេរិក លោក Donald Trump បាននិយាយថា លោកកំពុងផ្អាក​ការវាយប្រហារដោយយោធាលើអ៊ីរ៉ង់ដែលបានគ្រោងទុកសម្រាប់ថ្ងៃអង្គារ​​​១៩​​​ឧសភា​​សប្ដាហ៍នេះតាមការស្នើសុំរបស់បណ្ដា​រដ្ឋឈូងសមុទ្រ ខណៈការចរចាដ៏ច្បាស់លាស់​កំពុងកើតឡើង។

នៅក្នុងការបង្ហោះមួយលើបណ្ដាញ​សង្គម​​​ Truth Social លោកបាននិយាយថា លោកត្រូវបានស្នើសុំឱ្យធ្វើដូច្នេះដោយក្រុម​​មេដឹកនាំនៃប្រទេសកាតា អារ៉ាប៊ីសាអ៊ូឌីត និងអារ៉ាប់រួម។ ​

លោកបាននិយាយថា លោកត្រូវបានជូនដំណឹងថា កិច្ចព្រមព្រៀងមួយនឹងត្រូវបានធ្វើឡើងដែល "អាចទទួលយកបានយ៉ាងខ្លាំង" ចំពោះសហរដ្ឋអាមេរិក ដោយបន្ថែមថា "នឹងមិនមានអាវុធនុយក្លេអ៊ែរសម្រាប់អ៊ីរ៉ង់ទេ!"។​

ប៉ុន្តែលោកបានព្រមានថា សហរដ្ឋអាមេរិកនឹងត្រៀមខ្លួនរួចជាស្រេចដើម្បី "បន្តការវាយប្រហារទ្រង់ទ្រាយធំទាំងស្រុងលើអ៊ីរ៉ង់ ភ្លាមៗ" ប្រសិនបើមិនមានកិច្ចព្រមព្រៀងដែលអាចទទួលយកបាន។

មេបញ្ជាការយោធាជាន់ខ្ពស់អ៊ីរ៉ង់មួយរូប​​បានប្រាប់សហរដ្ឋអាមេរិកកុំឱ្យធ្វើ "កំហុសយុទ្ធសាស្ត្រ និងការគណនាខុសម្តងទៀត"។

ការប្រកាសចុងក្រោយរបស់លោក Trump លើអ៊ីរ៉ង់កើតឡើងស្របពេល​​​មានការធ្លាក់ចុះនៃប្រជាប្រិយ របស់លោក ហើយខណៈ​ការស្ទង់មតិបង្ហាញថា សង្គ្រាមនេះ​ ​កាន់តែមិនមានប្រជាប្រិយភាពនៅក្នុងសហរដ្ឋអាមេរិក​​។​

ការបង្ហោះរបស់លោក Trump បានកើតឡើងបន្ទាប់ពីអ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei បានបញ្ជាក់ថាគំនិត​របស់ទីក្រុងតេអេរ៉ង់ត្រូវបាន «បញ្ជូនទៅកាន់ភាគីអាមេរិកតាមរយៈប៉ាគីស្ថាន» ប៉ុន្តែពុំ​បានផ្តល់ព័ត៌មានលម្អិតទេ៕