វិមានក្រឹមឡាំងបាននិយាយកាលពីថ្ងៃចន្ទ ​​​​១៨​​ឧសភា សប្ដាហ៍នេះ ​ថាការអះអាងរបស់ប្រធានាធិបតីអ៊ុយក្រែនលោក Volodymyr Zelenskyy ដែលថារុស្ស៊ីកំពុងពិចារណាវាយប្រហារប្រទេសសមាជិក​​​របស់អង្គការ​​ណាតូពីប្រទេសបេឡារុស មិនសមនឹងទទួលបានការឆ្លើយតបពីរុស្ស៊ីទេ។​​

កាលពីថ្ងៃសុក្រសប្ដាហ៍មុន លោក Zelenskyy បាននិយាយថា ​រុស្ស៊ីកំពុងព្យាយាម​​​​ទាញបេឡារុសចូល​​កាន់តែជ្រៅក្នុងសង្គ្រាមរបស់ខ្លួននៅអ៊ុយក្រែន ហើយកំពុងថ្លឹងថ្លែងផែនការវាយប្រហារភា​គខាងជើងអ៊ុយក្រែន ឬប្រទេសមួយជា​សមាជិក​​​​របស់​​ណាតូពីទឹកដីបេឡារុស។ ​

បេឡារុសមានព្រំប្រទល់ជាប់អ៊ុយក្រែននៅភាគខាងត្បូង និងសមាជិកណាតូគឺ ​​ប៉ូឡូញ លីទុយអានី និងឡាតវី នៅភាគខាងជើង និងខាងលិច។ ប្រទេស​​នេះ​​បាន​អនុញ្ញា​​តឱ្យរុស្ស៊ីប្រើប្រាស់ទឹកដីរបស់ខ្លួនជាកន្លែងបើកការ​វាយកលុក​​​អ៊ុយក្រែននៅឆ្នាំ​២០២២​ និងជាទីតាំង​​ស្តុក​អាវុធនុយក្លេអ៊ែរយុទ្ធសាស្ត្ររបស់រុស្ស៊ី។

នៅពេលសួរអំពីការចោទប្រកាន់របស់មេដឹកនាំ​​អ៊ុយក្រែន អ្នកនាំពាក្យវិមានក្រឹមឡាំងលោក Dmitry Peskov បាននិយាយថា "សេចក្តីថ្លែងការណ៍បែបនេះ គ្មានអ្វីក្រៅពីការប៉ុនប៉ងញុះញង់បន្ថែមទៀតក្នុង​​គោលបំណងអូសបន្លាយ​សង្គ្រាម និងបង្កើនភាពតានតឹងនោះទេ។​​​​

លោកបានប្រាប់ក្រុមអ្នកសារព័ត៌មានថា ពួកលោក​​​មិនគិតថាសេចក្តីថ្លែងការណ៍បែបនេះសមនឹងទទួលបានការ​​​ឆ្លើយតប​​ណាមួយទេ។

កាលពីថ្ងៃចន្ទដើមសប្ដាហ៍​​នេះ​​​​​​​​​​​ ក្រសួងការពារជាតិបេឡារុសបាននិយាយថា កងកម្លាំងប្រដាប់អាវុធរបស់ខ្លួន សហការជាមួយរុស្ស៊ី បានចាប់ផ្តើមសមយុទ្ធមួយដើម្បីសាកល្បងការត្រៀមខ្លួនរបស់យោធាក្នុងការដាក់ពង្រាយអាវុធនុយក្លេអ៊ែរ។ ក្រសួងនេះ​បាននិយាយថា នេះមិនមានគោលបំណងប្រឆាំងនឹងរដ្ឋណាមួយទេ ហើយក៏មិនបង្កការគំរាមកំហែងសន្តិសុខនៅក្នុងតំបន់នោះដែរ៕