ប្រមុខអង្គការសុខភាពពិភពលោកWHO បាននិយាយកាលពីថ្ងៃចន្ទ១៨ ឧសភា​​​សប្ដាហ៍នេះ​​ ថា ការផ្ទុះឡើងនៃវីរុស​ហាន់តា (​hantavirus) និងជំងឺ​អេបូឡា (Ebola) ដ៏សាហាវ គឺ​ជាវិបត្តិចុងក្រោយនៅក្នុងសម័យកាលដ៏គ្រោះថ្នាក់ និងបែកបាក់គ្នា​។

ក្នុងពិធីបើកកិច្ចប្រជុំប្រចាំឆ្នាំរបស់អង្គការនៅទីក្រុងហ្សឺណែវ លោក Tedros Adhanom Ghebreyesus បាននិយាយអំពីការផ្ទុះឡើងនៃជំងឺអេបូឡាថ្មីនៅក្នុងសាធារណរដ្ឋប្រជាធិបតេយ្យកុងហ្គោ ដែលលោកបានប្រកាសគ្រា​​​​អាសន្នសុខភាពសាធារណៈអន្តរជាតិកាលពីចុងសប្តាហ៍មុន​​ និងការផ្ទុះឡើងនៃវីរុស​ហាន់តា​​ ដ៏កម្រនៅលើនាវាទេសចរណ៍ MV Hondius។

លោកបានប្រាប់កិច្ចប្រជុំរដ្ឋមន្ត្រីសុខាភិបាល និងប្រតិភូជាន់ខ្ពស់មកពីជុំវិញពិភពលោកថា វិបត្តិទាំងពីរនេះ គឺជាវិបត្តិចុងក្រោយនៅក្នុងពិភពលោក ដែល​​​​គ្របដណ្ដប់​​ដោយ​​​បញ្ហា​របស់ពួកលោក​​។

លោក Tedros ដែលត្រូវគេរំពឹងថានឹងពន្យល់លម្អិតអំពីហានិភ័យក្នុងអំឡុងពេលថ្លែងសុន្ទរកថាដ៏​​​សំខាន់របស់លោកទៅកាន់កិច្ចប្រជុំពេញនៃ​​​អង្គសុខភាពពិភពលោកនៅព្រឹកថ្ងៃអង្គារនេះ​​ បានថ្លែងថា​ ចាប់ពីជម្លោះ ​ដល់វិបត្តិសេដ្ឋកិច្ច រហូតដល់បម្រែបម្រួល​អាកាសធាតុ និងការកាត់បន្ថយជំនួយ ពួកលោក​​រស់នៅក្នុងសម័យកាលដ៏លំបាក គ្រោះថ្នាក់ និងបែកបាក់គ្នា។

លោកនាយករដ្ឋមន្ត្រីអេស្ប៉ាញ Pedro Sanchez ដែលប្រទេសរបស់លោកត្រូវបាន​កោត​​​សរសើរចំពោះការអនុញ្ញាតឱ្យនាវា​ទេសចរណ៍​ MV Hondius រងការវាយប្រហារពី​វីរុស​​ហាន់តា​ ចូលចតនៅកោះ Canary កាលពីសប្តាហ៍មុន សម្រាប់ការជម្លៀសអ្នកដំណើរ និងនាវិក បានសង្កត់ធ្ងន់ថា ការការពារអ្នកដទៃគឺជាមធ្យោបាយដ៏ល្អបំផុតដើម្បីការពារខ្លួនឯង​៕