លោកប្រធានាធិបតីរុស្ស៊ី​​​ ​ Vladimir Putin បាននិយាយក្នុងសុន្ទរកថាវីដេអូមួយមុនពេលដំណើរទស្សនកិច្ចទៅកាន់ប្រទេសចិនចាប់ផ្តើមនៅថ្ងៃអង្គារ ១៩​ឧសភា នេះ​​ថា រុស្ស៊ី និងចិន ត្រៀមខ្លួនជាស្រេចដើម្បីគាំទ្រគ្នាទៅវិញទៅមកលើបញ្ហាជាច្រើន រួមទាំងឯកភាពជាតិ និងការការពារអធិបតេយ្យភាពជាដើម​​។

លោក Putin បានថ្លែង​ ​ ខណៈលោក​ត្រៀម​ជួបជាមួយប្រធានាធិបតីចិនលោក​​ Xi Jinping សម្រាប់កិច្ចពិភាក្សានៅថ្ងៃពុធស្អែកនេះ​ ​ថាទំនាក់ទំនងរវាងរុស្ស៊ី និងចិន បានឈានដល់កម្រិត «មិនធ្លាប់មាន» នៃការយោគយល់គ្នា និងការជឿទុកចិត្តគ្នាទៅវិញទៅមក។​​​

មេដឹកនាំ​​រុស្ស៊ី​​រូបនេះ​​ ​បាន​​បន្ត​​ថា ប្រទេសទាំងពីរ ត្រៀមខ្លួនជាស្រេចដើម្បីសហការលើគោលការណ៍ដែលផ្តល់ផលប្រយោជន៍ទៅវិញទៅមក និងផ្អែកលើសមភាព និងគាំទ្រគ្នាទៅវិញទៅមកលើបញ្ហាដែលប៉ះពាល់ដល់ផលប្រយោជន៍ស្នូលរបស់ប្រទេសទាំងពីរ រួមទាំងការការពារអធិបតេយ្យភាព និងឯកភាពជាតិ។ យ៉ាងណា​លោកពុំ​បានផ្តល់ព័ត៌មានលម្អិតបន្ថែមទេ។

លោកថា រុស្ស៊ី និងចិន កំពុងពង្រីកទំនាក់ទំនងយ៉ាងសកម្មក្នុងវិស័យសេដ្ឋកិច្ច នយោបាយ និងការពារជាតិ ដោយបន្ថែមថា ការផ្សាភ្ជាប់យ៉ាងជិតស្និទ្ធនិងជាយុទ្ធសាស្ត្រ រវាងទីក្រុងមូស្គូ និងទីក្រុងប៉េកាំង កំពុងដើរតួនាទីធ្វើឱ្យមានស្ថិរភាព ក្នុងទំនាក់ទំនងពិភពលោក។លោកបន្ថែមថា​​​ ពួកលោក​​មិនប្រឆាំងនឹងនរណាម្នាក់ទេ ផ្ទុយទៅ​វិញ​​កំពុងធ្វើការដើម្បីបុព្វហេតុសន្តិភាព និងវិបុលភាពជាសកល។

​គួរឲ្យដឹងថា ​​​​​​​​​ដំណើរ​ទស្សនកិច្ច​របស់​លោក​​ Putin ​​​ទៅកាន់​ប្រទេស​ចិន​ បាន​កើតមានឡើង​​ត្រឹមតែ​​ប៉ុន្មានថ្ងៃ​ប៉ុណ្ណោះ​ ក្រោយ​ដំណើរទស្សនកិច្ច ​និង​ជំនួប​​កំពូល​​​​​របស់​​លោក​​ប្រធានាធិបតី​អាមេរិក​ Donald Trump ជាមួយ​​​​​លោក​Xi ​​កាលពីថ្ងៃទី​១៤​និង​១៥​​ឧសភា ថ្មីៗនេះ ៕